ఉత్తరాఖండ్‌లో చిక్కుకున్న విశాఖ వాసులు

ఈనాడు, విశాఖపట్నం: విశాఖపట్నానికి చెందిన సుమారు 20 మంది ఈనెల 18న దైవదర్శనం కోసం ఉత్తరాఖండ్‌ పర్యటనకు వెళ్లి చిక్కుకుపోయారు. బాధిత కుటుంబీకుల వివరాల మేరకు.. పర్యటనకు వెళ్లిన వారంతా మంగళవారం తిరుగు ప్రయాణమవ్వాల్సి ఉంది. ఇంతలో అక్కడ వాతావరణ పరిస్థితులు మారి భారీ వర్షం కురియడంతో రోడ్డు మార్గంలో కొండచరియలు విరిగిపడి పూర్తిగా దెబ్బతింది. దీంతో వారు విమానాశ్రయానికి చేరుకునే వీలు లేక గంజ్‌ ప్రాంతంలోని హోటల్‌ గదిలోనే ఉండిపోయారు. వారితోపాటు పర్యటనకు వెళ్లిన తెలంగాణకు చెందిన వారంతా కేంద్ర మంత్రి కిషన్‌రెడ్డి చొరవతో హెలీకాప్టర్లలో స్వస్థలాలకు బయలుదేరారని, తమవారినీ వెంటనే తీసుకురావాలని బాధిత కుటుంబీకులు కోరుతున్నారు. చిక్కుకుపోయిన వారిలో విశాఖ స్టీల్‌ప్లాంటు పరిసరాల్లో నివసించే 10 మంది ఉన్నారు.