కర్ణాటక మద్యం.. నాటుసారాతో ఆతిథ్యం

మంత్రి సభలో పోలీసుల ముందే ఇష్టారాజ్యం

డోన్‌ పట్టణం, డోన్‌, న్యూస్‌టుడే: ఇతర రాష్ట్రాల మద్యాన్ని అడ్డుకుంటున్నామని, నాటుసారాని అరికడుతున్నామని పోలీసులు పదేపదే చెబుతుంటారు. కానీ... ఏకంగా ఆర్థిక మంత్రి నిర్వహించిన సభలో కర్ణాటక మందు, నిషేధిత నాటుసారా గుప్పుమంటున్నా అదే పోలీసులు చూస్తూ ఉండిపోయారు. దీనికి నంద్యాల జిల్లా డోన్‌ పట్టణంలోని ఓ ప్రైవేట్‌ పాఠశాల వేదికైంది. డోన్‌ మండలం వెంకటనాయునిపల్లెకు చెందిన ఓ పార్టీ నాయకుడితోపాటు మరికొందరు వైకాపాలో చేరుతుండటంతో గురువారం డోన్‌లో ఆర్థిక మంత్రి బుగ్గన రాజేంద్రనాథ్‌రెడ్డి సమక్షంలో సమావేశం నిర్వహించారు. ఈ సందర్భంగా వివిధ ప్రాంతాల నుంచి జనం తరలివచ్చారు. సభా ప్రాంగణం, పరిసర ప్రాంతాల్లో పోలీసు అధికారులు, సిబ్బంది ఉన్నా... జనానికి కర్ణాటక మద్యాన్ని పంచారు. నాటుసారాను బిందెలో తీసుకొచ్చి గ్లాసులు, సీసాల్లో పోశారు. వాటిని తీసుకోవడానికి ఒకరిపై ఒకరు తోసుకుంటూ ఎగబడ్డారు. వాహనం వద్దకు విలేకరులు వచ్చేసరికి ఓ నాయకుడు గుంపులను చెదరగొట్టారు.