భగీరథ ప్రయత్నం.. భావితరాలకు మార్గం

భగీరథ ప్రయత్నంతో జల సిరులు భువి పైకి తెచ్చారు రైతు కొట్టె వెంకట్రావు. కృష్ణా జిల్లా మచిలీపట్నం మండలం కొత్తపూడి గ్రామానికి చెందిన ఈ రైతు ఏడాదిపాటు పంటలు పండించేందుకు పరిష్కారం చూపారు. సముద్రానికి 5-6 కి.మీ. దూరంలో ఉన్న తన పొలంలో 15 అడుగుల లోతులో భూమికి సమాంతరంగా గొట్టాలు ఏర్పాటు చేశారు. ఈ గొట్టాలకు రంధ్రాలు చేసి.. మట్టి, వ్యర్థాలు పైపులోకి రాకుండా కంకర, చిప్స్‌, ఇసుక, ఫిల్టర్‌ మెస్‌ చుట్టారు. ఊట నీరు పైపులోకి వచ్చేలా చేశారు. ఇలా వచ్చిన నీరు పడేందుకు 18 అడుగుల లోతులో సంపులు ఏర్పాటు చేశారు. ఇందులో నిల్వ ఉన్న నీటిని మోటారు సహాయంతో ఎత్తిపోసి 1.50 లక్షల లీటర్ల నీరు నిల్వ ఉంచే సామర్థ్య ఉన్న భారీ సంపులో పోస్తున్నారు. ఈ నీటితో తన 16 ఎకరాల భూమిని సాగు చేస్తున్నట్లు రైతు వెంకట్రావు తెలిపారు. ఇందుకు రూ.5 లక్షలు ఖర్చు చేసినట్లు వెల్లడించారు.

- ఈనాడు, అమరావతి