అనధికారికంగా విధులకు డుమ్మా

90 మంది వైద్యులకు సంజాయిషీ నోటీసులు

ఈనాడు, అమరావతి: బోధనాసుపత్రుల్లో పనిచేస్తూ అనధికారికంగా సెలవులు పెట్టి విధులకు దూరంగా ఉంటున్న సుమారు 90 మంది వైద్యులకు డైరెక్టరేట్‌ ఆఫ్‌ మెడికల్‌ ఎడ్యుకేషన్‌ సంచాలకుల కార్యాలయం సంజాయిషీ నోటీసులు జారీచేసింది. వీరిలో కొందరు ఏడాది, మరికొందరు మూడు, నాలుగు నెలల నుంచి విధులకు దూరంగా ఉన్నారు. సూపరింటెండెంట్లకు సమాచారం ఇవ్వకుండా కొందరు విధులకు దూరంగా ఉండటం గమనార్హం. రెండు నెలలకు పైగా విధులకు దూరంగా ఉన్న వారికి ప్రస్తుతం నోటీసులిస్తున్నారు. నోటీసులు అందుకున్న వారిలో ఇప్పటివరకు 15 మంది విధులకు హాజరవుతామని అభ్యర్థనలు ఇచ్చినట్లు ఇన్‌ఛార్జి డీఎంఈ డాక్టర్‌ వినోద్‌ తెలిపారు.