Vijayawada: విజయవాడ గేట్‌వే హోటల్‌.. ఇక నుంచి వివంత

విజయవాడ (లబ్బీపేట), న్యూస్‌టుడే: విజయవాడ ఎంజీ రోడ్డులోని గేట్‌వే హోటల్‌ ఇకనుంచి వివంత పేరుతో సేవలందిస్తుంది. వివంత లోగోను హోటల్‌ సీఎండీ మలినేని రాజయ్య, మలినేని గిరిధర్‌ గోపాల్‌, విజయ్‌ ఆవిష్కరించారు. ఈ సందర్భంగా రాజయ్య మాట్లాడుతూ నగరంలో ఫైవ్‌స్టార్‌ హోటల్‌ ఏర్పాటుచేయడం, దీనికి ఇటీవలే జాతీయ పర్యాటక అవార్డును కేంద్ర ప్రభుత్వం నుంచి అందుకోవడం ఎంతో ఆనందంగా ఉందన్నారు. ఎంతోమంది ప్రముఖులు ఈ హోటల్‌లో బస చేశారని చెప్పారు. నాణ్యత ప్రమాణాలు పాటించడం, వినియోగదారుల నుంచి ఆదరణ పొందడం వల్లే జాతీయస్థాయిలో గుర్తింపు లభించిందని తెలిపారు. కార్యక్రమంలో హోటల్‌ జీఎం అంకిత్‌ తదితరులు పాల్గొన్నారు.