నా పెంపుడు పులులను రక్షించండి

అవి ఉక్రెయిన్‌లో చిక్కుపోయాయి

కేంద్రానికి తణుకు వైద్యుడి విన్నపం

లండన్‌: ఆంధ్రప్రదేశ్‌లోని పశ్చిమగోదావరి జిల్లా తణుకుకు చెందిన డాక్టర్‌ గిరికుమార్‌ పాటిల్‌.. ఉక్రెయిన్‌లో చిక్కుకుపోయిన తన రెండు పెంపుడు పులులను రక్షించాలని భారత ప్రభుత్వాన్ని వేడుకుంటున్నారు. ఆయన ఉక్రెయిన్‌లోని లుహాన్స్క్‌ ప్రాంతంలో ఉన్న ఓ ఆస్పత్రిలో వైద్యుడిగా పనిచేసేవారు. యుద్ధం మొదలయ్యాక పోలండ్‌కు వలసవెళ్లారు. ఉక్రెయిన్‌లో ఉన్నప్పుడు కీవ్‌ జూ నుంచి రెండు పులులను సంపాదించి అల్లారుముద్దుగా పెంచుకునేవారు. లెపార్డ్‌, జాగ్వర్‌లకు పుట్టిన హైబ్రీడ్‌ పులికి ‘యశా’, బ్లాక్‌పాంథర్‌కు ‘సబ్రినా’ అని పేర్లు పెట్టుకుని గత రెండేళ్లుగా పోషిస్తున్నారు. యూట్యూబ్‌ ఛానల్‌లో వీడియోలతో ఆయన జాగ్వర్‌ కుమార్‌గా పేరుపొందారు. యుద్ధం కారణంగా అన్నీ అమ్ముకుని, పెంపుడు పులులను ఓ రైతు వద్ద వదిలిపెట్టి పోలండ్‌కు వెళ్లిపోయారు. ఇప్పుడు వాటిని ఉక్రెయిన్‌ నుంచి భారత్‌కు లేదా వేరే ఏ దేశానికైనా తరలించడానికి సాయం అందించాలని ఆయన కోరుతున్నారు. ఈ విషయంలో కీవ్‌లోని భారత రాయబార కార్యాలయం నుంచి సాయం అందడం లేదని ఆవేదన వ్యక్తం చేశారు.