సాహితీవేత్త, పరిశోధకుడు గంగప్ప మృతి

గుంటూరు(ఎస్వీఎన్‌కాలనీ), న్యూస్‌టుడే: సాహితీవేత్త, పరిశోధకుడు, ఏఎన్‌యూ విశ్రాంత ఆచార్యుడు డాక్టర్‌ ఎస్‌.గంగప్ప(85) శుక్రవారం మృతి చెందారు. గురువారం సాయంత్రం ఛాతి నొప్పి రావడంతో కుటుంబసభ్యులు గుంటూరులోని ఓ ఆసుపత్రిలో చేర్పించారు. చికిత్స పొందుతూ శుక్రవారం ఉదయం మరణించినట్లు గంగప్ప అల్లుడు గుమ్మా సాంబశివరావు తెలిపారు. గంగప్పకు భార్య, ఇద్దరు కుమారులు, కుమార్తె ఉన్నారు. శ్రీసత్యసాయి జిల్లా నల్లగొండ్రాయనిపల్లిలో గంగప్ప జన్మించారు. 1978లో ఏఎన్‌యూలో తెలుగు అధ్యాపకునిగా చేరి రీడర్‌గా, ఆచార్యులుగా, విభాగాధిపతిగా పనిచేసి 1996లో ఉద్యోగ విరమణ పొందారు. సుమారు 100 పుస్తకాలు, పలు పత్రికల్లో సాహిత్య వ్యాసాలు రాశారు. కేంద్ర సాహిత్య అకాడమీ ఫెలోషిప్‌ పొందారు. సాహిత్య సేవలకుగాను పలు అవార్డులు అందుకున్నారు. గుంటూరు ఎస్వీఎన్‌ కాలనీలోని స్వగృహంలో గంగప్ప భౌతికకాయాన్ని సాహిత్య అభిమానులు, విద్యార్థులు సందర్శించి నివాళులర్పించారు. అంత్యక్రియలు శనివారం నిర్వహించనున్నారు.