Andhra News: ఐదుగురు బలైన చోట... మళ్లీ తెగిన విద్యుత్తు తీగ

బొమ్మనహాళ్‌, ఉరవకొండ, న్యూస్‌టుడే: విద్యుత్తు తీగ తెగిపడి ఐదుగురు అసువులుబాసిన ఘటన నుంచి ఇంకా తేరుకోలేదు... మరోసారి అదేచోట తీగ తెగడంతో స్థానికులు భయాందోళనలకు గురయ్యారు. అనంతపురం జిల్లా బొమ్మనహాళ్‌ మండలంలో ఈ ఉదంతం చోటుచేసుకుంది. దర్గాహొన్నూరు పరిధిలో సుబ్బన్న అనే రైతు పొలం సమీపంలో మంగళవారం మధ్యాహ్నం 11 కేవీ విద్యుత్తు తీగ తెగింది. దగ్గర్లోని తోటలో ఉన్న ఓ రైతు గుర్తించి విద్యుత్తు సిబ్బందికి సమాచారం ఇవ్వడంతో వారు సరఫరా ఆపేశారు. సమీపంలోని కూలీలు, ఇతరులు ఆ చోటు నుంచి దూరంగా వెళ్లిపోయారు. ఎవరూ అటువైపు వెళ్లకుండా జాగ్రత్తలు తీసుకున్నారు. సాయంత్రమైనా తీగను సరిచేసేందుకు సిబ్బంది రాలేదు. ఈ నెల 2న అదే ప్రాంతంలో విద్యుత్తు తీగ తెగి ట్రాక్టరుపై పడటంతో అందులోని ఐదుగురు  కూలీలు మరణించారు. మరో ఇద్దరు కొనప్రాణాలతో కర్ణాటకలోని బళ్లారి ఆసుపత్రిలో చికిత్స పొందుతున్నారు.