పెన్నాలో ఇసుక అక్రమ తవ్వకాలపై నివేదిక

‘ఈనాడు’ కథనానికి స్పందన

తాడిపత్రి, న్యూస్‌టుడే: అనంతపురం జిల్లా తాడిపత్రి పరిసరాల్లో పెన్నానదిలోని ఇసుక అక్రమ తరలింపుపై ఉన్నతాధికారులకు నివేదిక పంపినట్లు తహసీల్దార్‌ మునివేలు తెలిపారు. వైకాపా నాయకులు నదిలో హద్దులు వేసుకుని, గేట్లను ఏర్పాటు చేసుకుని అక్రమంగా తవ్వకాలకు పాల్పడుతుండటంపై ఈ నెల 24న ‘ఈనాడు’ ప్రధాన సంచికలో ‘పెన్నాను పంచేసుకున్నారు’ శీర్షికతో ప్రచురితమైన కథనానికి రెవెన్యూ అధికారులు స్పందించారు. తహసీల్దార్‌ మునివేలు పెన్నానది ప్రాంతాన్ని గురువారం పరిశీలించారు. తాము వెళ్లక ముందే గేట్లను తొలగించారని, ఎవరెవరు ఆక్రమించుకున్నారో, ఎంతవరకు ఇసుకను అక్రమంగా తరలించారో నివేదిక తయారుచేసి ఉన్నతాధికారులకు పంపినట్లు ఆయన చెప్పారు. మైనింగ్‌ ఏడీ నాగయ్య కూడా సిబ్బందితో కలిసి పెన్నానదిలో పరిశీలించారు. అక్రమంగా ఇసుకను తరలిస్తున్న ట్రాక్టరును జప్తు చేశామని చెప్పారు. అక్రమ తవ్వకాలపై నివేదిక తయారుచేసినట్లు తెలిపారు. దీన్ని అరికట్టేందుకు చర్యలు తీసుకోవాలని రెవెన్యూ, పోలీసు, సెబ్‌ అధికారులకు లేఖ రాసినట్లు ఆయన వివరించారు.