న్యాయం చేయకపోతే ఆత్మహత్యే శరణ్యం

సీఎం నివాసం వద్దకు వచ్చిన భార్యాభర్తలు
అదుపులోకి తీసుకున్న పోలీసులు

తాడేపల్లి, న్యూస్‌టుడే: ‘విజయవాడ పోలీసులు మాకు న్యాయం చేయలేదు. ముఖ్యమంత్రి మా మొర ఆలకిస్తారని వచ్చాం. ఇక్కడ కూడా న్యాయం జరగకపోతే ఇద్దరం ఆత్మహత్య చేసుకుంటాం’ అంటూ భార్యాభర్తలు గురువారం తాడేపల్లిలోని సీఎం నివాసం వద్దకు వచ్చి ఆవేదన వ్యక్తం చేశారు. పోలీసుల కథనం ప్రకారం... రాయన జ్ఞానేంద్ర, అనూషా 2016లో ప్రేమించి పెళ్లి చేసుకున్నారు. వారికి ఇద్దరు సంతానం. భర్త తరఫు బంధువులు తమను చంపేందుకు ప్రయత్నిస్తున్నారంటూ భార్యాభర్తలు ముఖ్యమంత్రిని కలిసి వినతిపత్రం ఇవ్వాలని తాడేపల్లి వచ్చారు. వ్యక్తిగతానివి కాకుండా సామూహిక సమస్యలపై వినతిపత్రాలు ఇవ్వాలని చెక్‌పోస్టులోని సిబ్బంది వారికి సూచించారు. తమకు న్యాయం జరగకపోతే ఆత్మహత్యే శరణ్యమని భార్యాభర్తలు వాపోయారు. పోరంకి పోలీసులకు ఈ అంశంపై ఫిర్యాదు చేసినా పట్టించుకోలేదని, సీఎంను కలసి సమస్య వివరిస్తామని కోరారు. వినతిపత్రాన్ని తీసుకున్న చెక్‌ పోస్టులోని సిబ్బంది తాడేపల్లి పోలీసులకు సమాచారం అందించారు. ఇరువురినీ అదుపులోకి తీసుకుని పోలీసుస్టేషన్‌కు తరలించి విచారణ జరుపుతున్నారు.