సర్వేతో సమస్యకు పరిష్కారం

చేజర్ల, న్యూస్‌టుడే: శ్రీపొట్టి శ్రీరాములు నెల్లూరు జిల్లా చేజర్ల మండలం బిల్లుపాడులో వృద్ధురాలి ఇంటి స్థలం సమస్యకు అధికారులు శుక్రవారం పరిష్కారం చూపారు. గతంలో లక్ష్మమ్మకు ఇందిరమ్మ కాలనీ కింద మూడు సెంట్ల భూమిని మంజూరు చేశారు. ఈ ప్రదేశంలో తాజాగా జగనన్న కాలనీ ఏర్పాటు చేశారు. లక్ష్మమ్మ ఇంటి పక్కనే ఆమె చెల్లెలు కోడలైన రాజేశ్వరికి తొమ్మిది అంకణాల ఇంటి స్థలాన్ని కేటాయిస్తూ నివేశన పత్రం అందజేశారు. 40ఏళ్లుగా తన స్వాధీనంలో ఉన్న స్థలంలో ఇతరులు ప్రవేశించటానికి లేదని లక్ష్మమ్మ, ప్రభుత్వం ఇచ్చింది కనుక ఆ భూమిపై తనకే హక్కు ఉందటూ రాజేశ్వరి రెండు నెలలుగా తగాదా పడుతున్నారు. ఈ క్రమంలో రాజేశ్వరి ఆమె బంధువులు లక్ష్మమ్మపై దాడి చేసి ఆమె ఇంటిని కూల్చివేశారు. ఈ విషయమై బాధితురాలు చేజర్ల పోలీసుస్టేషన్లో ఫిర్యాదు చేశారు. దీంతో శుక్రవారం తహసీల్దారు శివకృష్ణయ్య తన సిబ్బందితో బిల్లుపాడుకు వెళ్లి ఇంటి స్థలాలను సర్వే చేయించారు. వివాదాస్పద భూమికి పక్కన ఖాళీగా ఉన్న స్థలాలను కలిపి ఇద్దరికి మంజూరు చేసిన మేరకు స్థలాన్ని చూపి హద్దులు ఏర్పాటు చేశారు. ఇక మీదట హద్దులు, స్థలాల విషయంలో గొడవ పడకుండా హామీ పత్రాలు తీసుకున్నారు. మరోవైపు లక్ష్మమ్మపై దాడి ఘటనపై సంగం సీఐ రవినాయక్‌ శుక్రవారం విచారణ జరిపారు. దాడికి పాల్పడిన అయిదుగురిపై కేసు సమోదు చేశామని ఆయన వివరించారు.