పోలవరం సవరించిన అంచనాలు ఆమోదించాలి

కేంద్ర మంత్రి నిర్మలా సీతారామన్‌కు బుగ్గన రాజేంద్రనాథ్‌రెడ్డి విజ్ఞప్తి

ఈనాడు, దిల్లీ: పోలవరం ప్రాజెక్టు సవరించిన అంచనాలను ఆమోదించాలని కేంద్ర ఆర్థిక శాఖ మంత్రి నిర్మలా సీతారామన్‌కు రాష్ట్ర ఆర్థిక శాఖ మంత్రి బుగ్గన రాజేంద్రనాథ్‌రెడ్డి విజ్ఞప్తి చేశారు. నిర్మలా సీతారామన్‌ ఆధ్వర్యంలో దిల్లీలో శుక్రవారం జరిగిన కేంద్ర బడ్జెట్‌ ముందస్తు సన్నాహక సమావేశంలో ఆయన పాల్గొన్నారు. అనంతరం.. సమావేశంలో చర్చించిన అంశాలపై రాజేంద్రనాథ్‌రెడ్డి ఓ ప్రకటన విడుదల చేశారు. ఆంధ్రప్రదేశ్‌ ప్రాధాన్యతలు, అవసరాలను కేంద్రం దృష్టికి తీసుకెళ్లానని తెలిపారు. విద్యా, వైద్యం, సామాన్య ప్రజలకు అండగా ఉండటంపైనే రాష్ట్ర ప్రభుత్వం ప్రధానంగా దృష్టి సారించినట్లు పేర్కొన్నారు. మూలధన వ్యయంపై ఇచ్చే స్వల్పకాలిక రుణాలను వచ్చే ఏడాదికి కూడా పొడిగించాలనే ప్రతిపాదనను కేంద్ర మంత్రి దృష్టికి తీసుకెళ్లినట్లు ఆయన వెల్లడించారు. వెనుకబడిన ఉత్తరాంధ్ర, రాయలసీమలోని నీటి పథకాలకు నిధులు ఇవ్వాలని కోరినట్లు చెప్పారు. పీఎం ఆవాస్‌ యోజనలో భాగంగా గృహ నిర్మాణాలకు నిధులిస్తున్నప్పటికీ మౌలిక సదుపాయాల కల్పనలో కేంద్ర భాగస్వామ్యం లేనందున ఈ అంశాన్ని కూడా పీఎంఏవైలో చేర్చాలని సూచించినట్లు తెలిపారు.