TTD: తితిదే 2023 డైరీలు, క్యాలెండర్లు.. కావాలంటే ఇలా చేయండి..

తిరుమల, న్యూస్‌టుడే: తితిదే ప్రతిష్ఠాత్మకంగా ముద్రించిన 2023వ సంవత్సరం క్యాలెండర్లు, డైరీలు భక్తులకు అందుబాటులోకి వచ్చాయి. తిరుపతి, తిరుమలలోని తితిదే పుస్తక విక్రయ కేంద్రాల్లో వీటిని ఉంచినట్లు తితిదే ఆదివారం ఒక ప్రకటనలో తెలిపింది. అదేవిధంగా ఒంటిమిట్టలోని శ్రీ కోదండరామస్వామివారి ఆలయం, దేవుని కడపలోని శ్రీ లక్ష్మీ వేంకటేశ్వరస్వామి వారి ఆలయాలతోపాటు నెల్లూరు, రాజమహేంద్రవరం, కాకినాడ, కర్నూలు, నంద్యాల, హనుమకొండలోని తితిదే కల్యాణ మండపాల్లో అందుబాటులో ఉన్నాయని తెలిపింది.

తితిదే క్యాలెండర్లు, డైరీలను భక్తులు tirupatibalaji. ap.gov.in వెబ్‌సైట్‌లో పబ్లికేషన్స్‌ను క్లిక్‌చేసి డెబిట్‌, క్రెడిట్‌ కార్డుల ద్వారా ఆర్డరు చేయవచ్చు. తపాలాశాఖ ద్వారా ఇంటివద్దకే అందిస్తున్నట్లు తితిదే తెలిపింది. భక్తులు డీడీ తీసి పంపొచ్చు. ఇందుకోసం ‘కార్యనిర్వహణాధికారి, తితిదే, తిరుపతి’ పేరిట ఏదైనా జాతీయ బ్యాంకులో డీడీ తీసి కవరింగ్‌ లెటర్‌తో కలిపి ‘ప్రత్యేకాధికారి, పుస్తక ప్రచురణల విక్రయ విభాగం, ప్రెస్‌ కాంపౌండ్‌, కేటీ రోడ్డు, తిరుపతి’ అనే చిరునామాకు పంపాల్సి ఉంటుంది. ప్రైవేటు ట్రాన్స్‌పోర్టు ద్వారా భక్తులకు తితిదే క్యాలెండర్‌, డైరీలను పంపుతారు. రవాణా ఛార్జీలు అదనంగా చెల్లించాల్సి ఉంటుంది. ఇతర వివరాలకు 99639 55585, 0877-2264209 నంబర్లలో సంప్రదించాలని సూచించింది.