సీఎం సారూ.. మాట తప్పారు

పరిహారం కోసం పోలవరం నిర్వాసితుల ఎదురు చూపులు
నెలలు గడుస్తున్నా అమలుకు నోచని హామీ

వేలేరుపాడు, న్యూస్‌టుడే: ముఖ్యమంత్రి జగన్‌మోహన్‌రెడ్డి పోలవరం నిర్వాసితులకు ఇచ్చిన హామీలకు.. జరుగుతున్న పరిణామాలకు పొంతనే లేదు. వరద బాధితులను పరామర్శించేందుకు ఈ ఏడాది ఆగస్టు 27న ముఖ్యమంత్రి విలీన మండలాల పర్యటనకు వచ్చారు. వేలేరుపాడు మండలం కన్నాయిగుట్టలో వరద బాధితులను పరామర్శించారు. ఈ సందర్భంగా మాట్లాడుతూ.. కేంద్ర ప్రభుత్వం ఇచ్చినా.. ఇవ్వకపోయినా.. రాష్ట్ర నిధులతోనైనా సెప్టెంబరు నెలాఖరుకల్లా 41.15 కాంటూరు పరిధిలోని నిర్వాసితులందరికీ ఆర్‌అండ్‌ఆర్‌ ప్యాకేజీ అందించి పునరావాస కాలనీలకు తరలిస్తామని చెప్పారు. హామీ ఇచ్చి రెండు నెలలు దాటినా నేటికీ నిర్వాసితులకు పరిహారం అందించక పోవడంతో విలీన మండలాల్లోని బాధితుల్లో నిరాశా నిస్పృహలు అలముకున్నాయి. 41.15 కాంటూరు పరిధిలో ఉన్న కుక్కునూరు, వేలేరుపాడు, వరరామచంద్రాపురం, కూనవరం మండలాల్లోని గ్రామాల నిర్వాసితులకు ఆర్‌అండ్‌ఆర్‌ ప్యాకేజీ కింద ఇంకా చెల్లించాల్సి ఉన్న (గిరిజనేతరులకు రూ.6.36 లక్షలు, గిరిజనులకు రూ.6.86 లక్షలు) మొత్తాన్ని ఇచ్చి పునరావాస కాలనీలకు తరలిస్తామని హామీ ఇచ్చారు. నెలలు గడుస్తున్నా పరిహారం ఊసే లేకపోవడంతో వేల కుటుంబాలు పిల్లాపాపలతో గుడారాల్లో తీవ్ర ఇబ్బందులు పడుతున్నాయి.

గుడారంలోనే కాలం వెళ్లదీస్తున్నాం

జులైలో గోదావరి వరదల కారణంగా పిల్లాపాపలతో దాచారం ఆర్‌అండ్‌ఆర్‌ కాలనీకి తరలివెళ్లాం. వరదలు తగ్గుముఖం పట్టకపోవడంతో అక్కడ 2 నెలలు కాలం వెళ్లదీశాం. వరదలు తగ్గాక ఇంటికి వచ్చి చూస్తే పూరిల్లు ఆనవాళ్లు లేకుండా కొట్టుకుపోయింది. చేసేదిలేక గుడారంలోనే ఉంటున్నాం. ప్యాకేజీ గురించి ముఖ్యమంత్రి చెప్పిన మాటలను నమ్ముకున్నాం.

గుండారపు రాజమ్మ, రేపాకగొమ్ము

* ముంపు మండలాలు: 6

* 41.15 కాంటూరు పరిధిలోని గ్రామాలు: 46

* 41.15 కాంటూరులోని నిర్వాసిత కుటుంబాలు: 9,000

* ఇప్పటి వరకు పరిహారం చెల్లించిన కుటుంబాలు:   3,500

* ఇంకా పరిహారం చెల్లించాల్సిన కుటుంబాలు:  5,500