యాదాద్రిలో భక్తుల సందడి

40 వేల మంది రాక

యాదగిరిగుట్ట, న్యూస్‌టుడే: యాదాద్రి పుణ్యక్షేత్రం ఆదివారం భక్తులతో కిటకిటలాడింది. ఆలయ పరిసరాలు, మండపాలు, క్యూ కాంప్లెక్స్‌తో పాటు ప్రసాదాల విక్రయశాల, కొండ కింద కల్యాణకట్ట, లక్ష్మీ పుష్కరిణి ప్రాంగణాలు సందడిగా మారాయి. సుమారు 40 వేల మంది భక్తులు శ్రీలక్ష్మీనరసింహస్వామిని దర్శించుకున్నారని ఆలయ అధికారులు తెలిపారు. రూ.73,97,136 ఆదాయం సమకూరిందని చెప్పారు. ఎంపీ, ప్రముఖ రచయిత విజయేంద్రప్రసాద్‌ పంచనారసింహులను దర్శించుకుని పూజలు చేశారు. ఆయనకు ఆలయ ప్రొటోకాల్‌ అధికారి ఉడెపు రాజు దేవుడి ప్రసాదం అందజేశారు.