ప్రభుత్వ వైద్య కళాశాలల్లో పెరగనున్న పీజీ సీట్లు

630 సీట్ల పెంపునకు కేంద్ర ఆరోగ్యశాఖ అనుమతి
వసతుల కల్పనకు రూ.453.6 కోట్ల సాయం

గుంటూరు వైద్యం, న్యూస్‌టుడే: రాష్ట్రంలోని ప్రభుత్వ వైద్యకళాశాలల్లో అదనంగా పీజీ వైద్యవిద్య సీట్లు పెంచేందుకు అవసరమైన మౌలిక వసతుల కల్పనకు రూ.453.6 కోట్లు ఆర్థికసాయం చేసేందుకు కేంద్ర ఆరోగ్య, కుటుంబ సంక్షేమశాఖ అనుమతించినట్లు అండర్‌ సెక్రటరీ చందనకుమార్‌ రాష్ట్ర ప్రభుత్వానికి లేఖ పంపారు. వచ్చే విద్యా సంవత్సరం(2023-24)లో రాష్ట్రవ్యాప్తంగా 11 ప్రభుత్వ వైద్య కళాశాలల్లో 688 సీట్ల పెంపు కోసం ప్రతిపాదనలు పంపగా, సెంట్రల్లీ స్పాన్సర్డ్‌ స్కీమ్‌ (సీఎస్‌ఎస్‌) రెండోదశ కింద 630 సీట్ల పెంపునకు అనుమతించినట్లు ఆ లేఖలో పేర్కొన్నారు. ఒక్కో పీజీ సీటుకు రూ.1.20 కోట్ల వంతున ఈ ప్రాజెక్టుకు మొత్తం రూ.756 కోట్లకు అనుమతి మంజూరుచేసినట్లు తెలిపారు. ఇందులో కేంద్ర, రాష్ట్రప్రభుత్వాలు 60:40 నిష్పత్తిలో వెచ్చించాలి. కేంద్రం తన వాటాగా రూ.453.6 కోట్లు భరించనున్నట్లు తెలిపారు.

కళాశాలలు.. సీట్ల వివరాలు

రాష్ట్రంలోని 11 ప్రభుత్వ వైద్యకళాశాలల్లో పీజీ సీట్లు పెంచేందుకు  అనుమతించిన వివరాలివే.. కేఎంసీ కర్నూలు-41, జీఎంసీ అనంతపురం-65, జీఎంసీ కడప-69, ఎస్వీ వైద్యకళాశాల తిరుపతి-75, జీఎంసీ  ఒంగోలు-79, ఏసీఎస్‌ఆర్‌ జీఎంసీ నెల్లూరు-5, జీఎంసీ గుంటూరు-34,  ఎస్‌ఎంసీ విజయవాడ-71, ఆర్‌ఎంసీ కాకినాడ-46, ఏఎంసీ విశాఖపట్నం-128, జీఎంసీ శ్రీకాకుళం-17 కలిపి మొత్తం 630 సీట్లకు ఆర్థికసాయం చేసేందుకు అనుమతించారు.