వేడుకగా పద్మావతీ అమ్మవారి పంచమి తీర్థం

తిరుచానూరు, న్యూస్‌టుడే: తిరుచానూరు శ్రీపద్మావతీ అమ్మవారి పంచమి తీర్థం సోమవారం వైభవంగా జరిగింది. కార్తిక బ్రహోత్సవాల్లో చివరగా జరిగే పంచమి తీర్థం రోజున చక్రస్నానంతో కలిసి పుణ్యస్నానాలు చేసేందుకు భక్తులు పోటెత్తారు. అలమేలుమంగ జన్మించిన పద్మ సరోవరంలోనే చక్రస్నానం నిర్వహించడం ఆనవాయితీ. ఇందుకోసం సారెను తిరుమల శ్రీవారి ఆలయం నుంచి తిరుచానూరు వరకు కాలినడకన ఊరేగింపుగా తీసుకొచ్చారు. ఆలయంలో రాత్రి జరిగిన ధ్వజావరోహణంతో కార్తిక బ్రహ్మోత్సవాలు పరిసమాప్తమయ్యాయి. కార్యక్రమంలో తితిదే ఛైర్మన్‌ వైవీ సుబ్బారెడ్డి, ఈవో ఏవీ ధర్మారెడ్డి, జేఈవో వీరబ్రహ్మం, చంద్రగిరి ఎమ్మెల్యే చెవిరెడ్డి భాస్కర్‌రెడ్డి తదితరులు పాల్గొన్నారు.