తిరుపతిలో శ్రీవాణి ట్రస్టు టికెట్ల కేంద్రం

తిరుపతి (గాంధీ రోడ్డు), న్యూస్‌టుడే: శ్రీవారి దర్శనం కోసం శ్రీవాణి ట్రస్టు ఆఫ్‌లైన్‌ టికెట్లను తిరుపతిలో అందుబాటులోకి తీసుకొచ్చినట్లు తితిదే జేఈవో వీరబ్రహ్మం తెలిపారు. మాధవం అతిథి గృహంలో ఏర్పాటు చేసిన ఈ కౌంటర్లను బుధవారం జేఈవో ప్రారంభించారు. ఈ సందర్భంగా ఆయన మాట్లాడుతూ.. శ్రీవాణి ట్రస్టుకు రూ.10వేల విరాళం ఇచ్చి రూ.500 చెల్లించే భక్తులకు ఇప్పటిదాకా తిరుమలలో ఆఫ్‌లైన్‌ టికెట్లు జారీ చేశామని, ఈ ప్రక్రియలో దాతల ఇబ్బందులను గుర్తించి తితిదే శ్రీవాణి ట్రస్టు ఆఫ్‌లైన్‌ టికెట్లను తిరుపతిలోనే జారీ చేసే ఏర్పాట్లు చేసిందని తెలిపారు. 

* శ్రీవారి సర్వ దర్శనానికి తిరుమలకు వస్తున్న భక్తుల సంఖ్య అధికంగా ఉంది. బుధవారం సాయంత్రానికి ఎస్‌ఎస్‌డీ టోకెన్లు లేకుండా సర్వ దర్శనానికి క్యూలైన్లలో వచ్చిన భక్తులకు 24 గంటల్లో శ్రీవారి దర్శనం లభించనుందని తితిదే తెలిపింది.