బంగ్లాదేశ్‌లో డాలర్ల కొరత.. నిలిచిన మిర్చి ఎగుమతులు

ఈనాడు-అమరావతి: బంగ్లాదేశ్‌ను అమెరికా డాలర్ల కొరత వేధిస్తోంది. అక్కడి ఆర్థిక పరిస్థితుల కారణంగా వాటి నిల్వలు క్షీణించాయి. ఈ ప్రభావంతో ఇండియా-బంగ్లాదేశ్‌ మధ్య మిర్చి లావాదేవీలు తగ్గిపోయాయి. సుమారు 3-4 నెలల నుంచి ఈ పరిస్థితి ఉన్నా.. ఇటీవల మరింత ఎక్కువైంది. రెండు వారాల వ్యవధిలో గుంటూరులో మిర్చి ధరలు తగ్గడానికి ఇది కూడా ఓ కారణమైంది. ప్రభుత్వం తక్షణమే దిద్దుబాటు చర్యలు తీసుకోవాలని రైతులు, వ్యాపారులు కోరుతున్నారు. ఇండియా నుంచి తేజ రకం మిర్చి ఎగుమతయ్యే దేశాల్లో చైనా, బంగ్లాదేశ్‌ ముందు వరుసలో ఉన్నాయి. చైనాలో కరోనాతో లాక్‌డౌన్‌ పరిస్థితులు పెరగడంతో అక్కడికి ఎగుమతులు పూర్తిగా మందగించాయి. ఇదే సమయంలో బంగ్లాదేశ్‌లో డాలర్‌ సంక్షోభంతో ప్రతికూల పరిస్థితి ఏర్పడింది. గుంటూరు మార్కెట్‌కు కొత్త సరకు వస్తున్న సమయంలో తేజ రకం మిర్చి ధరలు తగ్గుతుండటం కర్షకులను కలవరపెడుతోంది. ఈ రకం క్వింటాకు రూ.2 వేల వరకు ధర తగ్గింది.

లెటర్‌ ఆఫ్‌ క్రెడిట్‌(ఎల్‌సీ) ఇవ్వని బ్యాంకులు

బంగ్లాదేశ్‌లో మిర్చి వ్యాపారులు పది శాతం సొమ్ము చెల్లిస్తే వారి మీద నమ్మకంతో అక్కడి బ్యాంకులు 100 శాతానికి లెటర్‌ ఆఫ్‌ క్రెడిట్‌(ఎల్‌సీ) మంజూరు చేసేవి. దీని ఆధారంగా మన దేశ వ్యాపారులు మిర్చి ఎగుమతి చేసేవారు. ప్రస్తుతం అక్కడ నెలకొన్న ఆర్థిక పరిస్థితుల దృష్ట్యా మొత్తం సొమ్ము చెల్లించినా ఎల్‌సీ ఇవ్వడం లేదు. ఇదే మిర్చి వ్యాపారానికి శరాఘాతంగా మారింది. ఈ నేపథ్యంలో డాలర్లకు ప్రత్యామ్నాయంగా రూపాయి మారకపు విలువతో లావాదేవీలు జరిగేలా చూడాలని కేంద్ర ప్రభుత్వాన్ని వ్యాపారులు కోరుతున్నారు.