Andhra News: విద్యుత్‌ ఉద్యోగులకు అందని జీతాలు

ఈనాడు-అమరావతి: విద్యుత్‌ శాఖలో పనిచేస్తున్న ఉద్యోగులకు యాజమాన్యం షాక్‌ ఇచ్చింది. ప్రతి నెలా మొదటి తేదీన ఉద్యోగులకు చెల్లించాల్సిన జీతాలను నిలిపేసింది. దీనికి నిధులు సర్దుబాటు కాకపోవడమే కారణమని సమాచారం. దీంతో ఉద్యోగులకు నవంబరు నెల జీతం గురువారం రాత్రి వరకు అందలేదు.  జెన్‌కో, ట్రాన్స్‌కో, మూడు డిస్కంల పరిధిలో పనిచేస్తున్న సుమారు 28 వేల మంది సిబ్బందికి మరోసారి నిరీక్షణ తప్పలేదు. గత ఫిబ్రవరిలో సుమారు రెండు వారాల పాటు జీతాల చెల్లింపులో యాజమాన్యం ఆలస్యం చేసింది. జెన్‌కో ఉద్యోగులు ఎండీ కార్యాలయం ఎదుట ఆందోళన చేసిన తర్వాత జీతాలను విడుదల చేసింది. అప్పటి నుంచి ప్రతి నెలా మొదటి తేదీనే చెల్లిస్తోంది. మళ్లీ 8 నెలల తర్వాత.. ఒకటో తేదీన జీతాలు చెల్లించలేదు. పింఛన్‌దారులు, కాంట్రాక్టు ఉద్యోగులకు కూడా ఇబ్బందులు తప్పడం లేదు. సోమవారం నాటికి నిధులు సర్దుబాటు అవుతాయని, అదే రోజు జీతాలు చెల్లిస్తామని యాజమాన్యం చెబుతోందని ఉద్యోగ సంఘాల నేతలు తెలిపారు.