పోలవరం నిధుల కోసం మరో కమిటీ

ఈనాడు, అమరావతి: పోలవరం ప్రాజెక్టులో రీయింబర్స్‌మెంటు నిధులు, అడ్‌హాక్‌ నిధుల అంశాన్ని పరిశీలించేందుకు కేంద్రం ఒక కమిటీని నియమించింది. ఆ కమిటీ సభ్యులతో హైదరాబాద్‌లోని పోలవరం ప్రాజెక్టు అథారిటీ కార్యాలయంలో శనివారం ఒక సమావేశం నిర్వహించారు. పోలవరం చీఫ్‌ ఇంజినీరు సుధాకర్‌బాబు, ఎస్‌ఈ నరసింహమూర్తి ఈ సమావేశంలో పాల్గొన్నారు. పోలవరం ప్రాజెక్టులో ఇప్పటికే రాష్ట్రప్రభుత్వం ఖర్చుచేసిన నిధులు, వచ్చే జూన్‌ వరకూ చేయబోయే పనులకు అడ్‌హాక్‌గా నిధులు కలిపి రూ.10,100 కోట్లు ఇవ్వాలని ఆంధ్రప్రదేశ్‌ ప్రభుత్వం కోరుతోంది. పోలవరం ప్రాజెక్టు అథారిటీ సమావేశంలో ఇటీవలే ఈ విషయం చర్చకు వచ్చింది. అంతకుముందే జలవనరులశాఖ ఉన్నతాధికారులు దిల్లీ వెళ్లి కేంద్ర జల్‌శక్తి అధికారులతో చర్చించారు. ఈ నేపథ్యంలో కేంద్ర జలశక్తి కార్యదర్శి పంకజ్‌కుమార్‌తో తాజాగా ఒక సమావేశం నిర్వహించారు. ఆ సమావేశంలో చర్చల మేరకు నలగురు సభ్యులతో కేంద్ర జల్‌శక్తిశాఖ ఒక కమిటీని నియమించింది. డిజైన్ల డైరెక్టరేట్‌ నుంచి ఇద్దరు, ప్రాజెక్టు వ్యయ డైరెక్టరేట్‌ నుంచి ఇద్దరు అధికారులను ఈ కమిటీలో నియమించారు. పోలవరంలో ఇంతకుముందే అనుమతి పొందిన డీపీఆర్‌ను దాటి, ఆ పరిధిలోకి రాని అంశాలకు నిధులు ఇవ్వబోమని కేంద్రం, పోలవరం అథారిటీ అడ్డుచెబుతూ వస్తున్నాయి. మరోవైపు డ్యాం డిజైన్‌ రివ్యూప్యానెల్‌ సూచించిన సిఫార్సులు, వారు ఆమోదించిన డిజైన్ల మేరకే పనులు చేసినందున వాటికి అయ్యే అదనపు నిధులు కేంద్రం ఇవ్వాల్సిందేనని రాష్ట్రం పట్టుబడుతోంది. ఆ వివాదం తేలకపోవడంతో వివిధ కారణాలను చూపుతూ కేంద్రం పోలవరం నిధులను సరిగా రీయింబర్సు చేయట్లేదు. దీంతో తాజా కమిటీ ఆ అంశాలను అధ్యయనం చేసి కేంద్ర జల్‌శక్తి శాఖకు అవసరమైన సిఫార్సులు చేస్తుంది. ఈ కమిటీ సభ్యులతో హైదరాబాద్‌ పోలవరం ప్రాజెక్టు అథారిటీ కార్యాలయంలో శనివారం వివిధ అంశాలపై చర్చలు జరిగాయి.