నూతన వైద్య కళాశాలల నిర్మాణానికి సహకరించండి

కేంద్ర మంత్రి మాండవీయకు రాష్ట్ర మంత్రి రజిని వినతి

ఈనాడు, దిల్లీ: ఆంధ్రప్రదేశ్‌లో కొత్తగా నిర్మిస్తున్న వైద్య కళాశాలలకు కేంద్ర ప్రభుత్వం సహకరించాలని కేంద్ర వైద్యారోగ్య శాఖ మంత్రి డాక్టర్‌ మన్‌సుఖ్‌ మాండవీయకు రాష్ట్ర వైద్యారోగ్యశాఖ మంత్రి విడదల రజిని విజ్ఞప్తి చేశారు. కేంద్ర మంత్రిని దిల్లీలో సోమవారం ఆమె కలిశారు. కేంద్ర ప్రభుత్వం నుంచి అనుమతులు ఇచ్చిన పాడేరు, మచిలీపట్నం, పిడుగురాళ్లలో కళాశాలల నిర్మాణ పనులు శరవేగంగా సాగుతున్నాయని తెలిపారు. ప్రతి జిల్లాలో కనీసం ఒక వైద్య కళాశాల ఉండేలా ముఖ్యమంత్రి జగన్‌మోహన్‌రెడ్డి చర్యలు తీసుకున్నారని, ఇప్పటికే అన్ని చోట్లా వాటి నిర్మాణం ప్రారంభమైందన్నారు. కొత్తగా నిర్మిస్తున్న 17 కళాశాలలకు తగిన ఆర్థిక సహాయాన్ని అందజేయాలని ఆమె విజ్ఞప్తి చేశారు. అనంతరం వివిధ అంశాలపై ఆమె కేంద్ర మంత్రికి వినతిపత్రాలు అందజేశారు.