Praveen Prakash: సారొస్తారు.. మెనూతో సిద్ధంగా ఉండాల్సిందే..!

పాఠశాలల తనిఖీలకు ముఖ్య కార్యదర్శి ప్రవీణ్‌ ప్రకాష్‌

ఈనాడు, అమరావతి: పాఠశాలల తనిఖీలకు క్షేత్రస్థాయిలో ముఖ్య కార్యదర్శి ప్రవీణ్‌ ప్రకాష్‌ (Praveen Prakash) పర్యటించే సమయంలో పాటించాల్సిన నిబంధనలతో పాటు ఆయన తీసుకునే ఆహార మెనూను సైతం పేర్కొంటూ ఆదేశాలు జారీ అయ్యాయి. ఎక్కడైనా రాత్రి బస చేసిన సమయంలో ఆయనకు ఏ సమయానికి ఏ మోనూను అందించాలో పేర్కొన్నారు. జిల్లాల పర్యటనకు వెళ్లిన సమయంలో ఉదయం 9గంటల నుంచి సాయంత్రం 4గంటల వరకు తనిఖీలు, సాయంత్రం రెసిడెన్షియల్‌ పాఠశాలలు, కస్తూర్బాగాంధీ బాలికా విద్యాలయాలు(కేజీబీవీ), ఆదర్శ పాఠశాలలను సందర్శించనున్నారు. ఎనిమిదో తరగతి విద్యార్థులకు ట్యాబ్‌ల పంపిణీకి సన్నాహాలు, ఉపాధ్యాయులకు శిక్షణ, మధ్యాహ్న భోజన పథకం, నాడు-నేడు, విద్యాకానుక, సీబీఎస్‌ఈ అనుబంధం, ఫార్మెటివ్‌-1,2 పరీక్షలలో విద్యార్థుల పనితీరు, సమ్మెటివ్‌-1 పరీక్షకు సన్నద్ధత, ఆంగ్ల మాధ్యమంలో పనితీరు తదితర సమాచారాన్ని అధికారులు సిద్ధం చేయాల్సి ఉంటుంది. అలాగే మోనూ కూడా. ఇటీవల ఎన్టీఆర్‌ జిల్లా కొండపల్లి, గుంటూరు జిల్లా మంగళగిరి పరిధిలోని ఆత్మకూరు పాఠశాలలను ఆయన తనిఖీలు చేశారు.

బస చేస్తే మెనూ ఇలా..

* ఉదయం 6గంటలకు టీతో పాటు పార్లే లేదా క్రాక్‌జాక్‌ బిస్కెట్లు.
* 8గంటలకు ఇడ్లీ, దోశ, ఉల్లి దోశల్లో ఏదో ఒకటి అల్పాహారం.

* మధ్యాహ్నం 1.30గంటలకు కూరగాయల కూరతో చపాతి లేదా పుల్కా.
* సాయంత్రం 5గంటలకు టీ, బిస్కెట్స్‌

* రాత్రి 8.30గంటలకు కూరగాయల కూరతో పుల్కా లేదా చపాతి. ఒక గ్లాసు పాలు.
* పండ్లు, ఎండు ఫలాలు, పండ్ల రసాలు, మాంసాహారం, ఇతర ఆహార పదార్థాలు తీసుకోరు.