రైతన్నకు ‘ఈ-క్రాప్‌’ కష్టాలు

గోకవరం, న్యూస్‌టుడే: ఈ-క్రాప్‌లో పంట నమోదు చేయకపోవడంతో ధాన్యం విక్రయించేందుకు రైతులు అవస్థలు పడుతున్నారు. తూర్పుగోదావరి జిల్లా గోకవరం మండలం కృష్ణునిపాలెం గ్రామానికి చెందిన గుర్రాల రాములు సొంత పొలంతో పాటు కొంత కౌలుకు తీసుకొని 12 ఎకరాల్లో వరి సాగు చేశారు. ఇందులో 5 ఎకరాల పంట వివరాలు ఈ క్రాప్‌లో నమోదు చేసుకున్నారు. మిగతా భూమిలోని వివరాలు నమోదు చేయలేదు. ఈ ఏడెకరాల్లో పండిన ధాన్యాన్ని గ్రామంలోని ఆర్‌బీకేలో విక్రయించాలని చూడగా తీసుకోలేదు. దీంతో గురువారం ధాన్యం బస్తాలను కృష్ణునిపాలెం సచివాలయం వద్ద వేసి నిరసన తెలిపారు. కౌలు కార్డులు ఇచ్చిన అధికారులు ఈ క్రాప్‌ ఎందుకు చేయలేదని రైతు ప్రశ్నించారు. విషయం తెలుసుకున్న ఇన్‌ఛార్జి తహసీల్దారు దివ్యభారతి, ఎంపీడీవో మూర్తి, ఏవో రాజేశ్వరి వచ్చి రైతుతో మాట్లాడారు. సాంకేతిక లోపంతో సమస్య ఏర్పడిందన్నారు. పరిష్కరిస్తామని చెప్పి, రైతు ధాన్యాన్ని మిల్లుకు తరలించారు.