ట్రాక్టరు బోల్తాపడిన ఘటనలో మృతుల కుటుంబాలకు రూ.5 లక్షల పరిహారం

ఉపముఖ్యమంత్రి నారాయణస్వామి

ఈనాడు డిజిటల్‌, చిత్తూరు: చిత్తూరు జిల్లా పూతలపట్టు మండలం లక్ష్మయ్యవూరు వద్ద బుధవారం రాత్రి ట్రాక్టర్‌ బోల్తా పడిన ఘటనలో మృతుల కుటుంబాలకు ప్రభుత్వం తరఫున రూ.5 లక్షల చొప్పున పరిహారం అందిస్తామని ఉప ముఖ్యమంత్రి నారాయణస్వామి ప్రకటించారు. గురువారం ఆయన పూతలపట్టు, చిత్తూరు ఎమ్మెల్యేలు ఎంఎస్‌ బాబు, ఆరణి శ్రీనివాసులుతో కలిసి మృతుల కుటుంబసభ్యులను,  క్షతగాత్రులను పరామర్శించారు. మరణించిన ట్రాక్టర్‌ డ్రైవర్‌ సురేందర్‌రెడ్డి కుటుంబానికి ఇల్లు మంజూరు చేస్తున్నట్లు తెలిపారు. ఆయన పిల్లలను చదివిస్తానని చెప్పారు. మృతుల కుటుంబాలకు ఎంఎస్‌ బాబు వ్యక్తిగతంగా రూ.25 వేలు చొప్పున అందిస్తానని వెల్లడించారు. ఈ ప్రమాదంలో ఆరుగురు మరణించగా, 19 మంది గాయపడ్డారు.