నాబార్డు సాయంతో చేపడుతున్న కార్యక్రమాలు విజయవంతం: సీఎం

ఈనాడు, అమరావతి: నాబార్డు సహకారంతో విద్య, వైద్యం, వ్యవసాయ రంగాల్లో చేపడుతున్న కార్యక్రమాలు విజయవంతంగా నడుస్తున్నాయని ముఖ్యమంత్రి జగన్‌మోహన్‌రెడ్డి పేర్కొన్నారు. భవిష్యత్తులోనూ ఇదే తోడ్పాటు అందించాలని కోరారు. నాబార్డు ఛైర్మన్‌ షాజీ శనివారం ముఖ్యమంత్రిని కలిశారు. నాబార్డు సాయంతో చేపడుతున్న కార్యక్రమాలపై చర్చించారు. రాష్ట్రంలో ప్రజల జీవన ప్రమాణాలను మెరుగుపరిచేందుకు ప్రభుత్వం వివిధ రంగాల్లో చేపడుతున్న కార్యక్రమాలు దోహదపడుతున్నాయని సీఎం జగన్‌ పేర్కొన్నారు. సమావేశంలో ఎంపీ వల్లభనేని బాలశౌరి, నాబార్డు ప్రతినిధులు పాల్గొన్నారు.