మార్చి రెండో వారంలో శాసనసభ సమావేశాలు!

ఈనాడు, అమరావతి: శాసనసభ బడ్జెట్‌ సమావేశాలను మార్చి రెండో వారంలో ప్రారంభించేందుకు రాష్ట్ర ప్రభుత్వం సన్నద్ధమైనట్లు తెలిసింది. మార్చి 3, 4 తేదీల్లో విశాఖపట్నంలో గ్లోబల్‌ ఇన్వెస్ట్‌మెంట్‌ సమ్మిట్‌ జరగనుంది. దాని తర్వాతే శాసనసభ సమావేశాలను పూర్తిస్థాయిలో చేపట్టాలనే నిర్ణయానికి ప్రభుత్వం వచ్చిందంటున్నారు. తొలుత ఫిబ్రవరి నెలాఖరునే అసెంబ్లీ సమావేశాలను ప్రారంభించి 21 లేదా 22 పనిదినాలను చేపట్టాలని భావించారు. అయితే... పెట్టుబడుల సదస్సు తర్వాతే సమావేశాలను నిర్వహించాలన్న ప్రతిపాదన వైపే ప్రభుత్వం మొగ్గు చూపిందంటున్నారు. మార్చి రెండో వారంలో సమావేశాలను మొదలుపెట్టి నెలాఖరు వరకు కొనసాగిస్తారని లేదంటే మూడో వారం చివర్లోనే ముగించే అవకాశముందని ప్రభుత్వ వర్గాలు తెలిపాయి.