షార్‌కు చేరిన 36 వన్‌వెబ్‌ ఉపగ్రహాలు

శ్రీహరికోట, న్యూస్‌టుడే: వన్‌వెబ్‌కు చెందిన 36 ఉపగ్రహాలు తిరుపతి జిల్లాలోని సతీశ్‌ ధావన్‌ స్పేస్‌ సెంటర్‌(షార్‌)కు శనివారం చేరుకున్నాయి. ఫ్లోరిడాలో రూపొందించిన ఈ ఉపగ్రహాలు చెన్నై విమానాశ్రయానికి రాగా.. అక్కడి నుంచి ప్రత్యేక వాహనంలో షార్‌కు తరలించారు. వీటిని మార్చిలో ఎల్‌వీఎం-3 వాహకనౌక ద్వారా ప్రయోగించనున్నారు. యూకే ఆధారిత శాటిలైట్‌ బ్రాడ్‌బ్యాండ్‌ సంస్థ వన్‌వెబ్‌, ఇస్రో న్యూ స్పేస్‌ ఇండియా మధ్య వాణిజ్య ఒప్పందంలో భాగంగా ఈ ప్రయోగం చేపడుతున్నారు. మొదటి దశలో భాగంగా ఇప్పటికే 36 ఉపగ్రహాలను కక్ష్యలోకి పంపారు. వీటిద్వారా దేశంలో ఉపగ్రహ ఆధారిత ఇంటర్నెట్‌ సేవలు మే నాటికి అందుబాటులోకి రానున్నాయి. మన దేశానికి చెందిన భారతి ఎంటర్‌ప్రైజెస్‌ వన్‌వెబ్‌లో ప్రధాన వాటాదారు.