బచ్చుల అర్జునుడికి చంద్రబాబు పరామర్శ

విజయవాడ (కరెన్సీనగర్‌), న్యూస్‌టుడే: గుండెపోటుకు గురై విజయవాడ రమేష్‌ ఆసుపత్రిలో చికిత్స పొందుతున్న ఎమ్మెల్సీ బచ్చుల అర్జునుడిని తెలుగుదేశం అధినేత చంద్రబాబు మంగళవారం రాత్రి పరామర్శించారు. ఆయన ఆరోగ్య పరిస్థితిని వైద్యులద్వారా తెలుసుకున్నారు. అనంతరం చంద్రబాబు మీడియాతో మాట్లాడుతూ.. ‘బచ్చుల అర్జునుడిని ఈ పరిస్థితుల్లో చూస్తానని అనుకోలేదు. చాలా బాధాకరం. ఒకరోజు ముందు నాతో ఫోన్లో మాట్లాడి చాలా విషయాలు చెప్పారు. ఇంతలోనే ఇలా జరిగింది’ అని పేర్కొన్నారు. మరో రెండురోజుల వరకూ ఏమీ చెప్పలేమని వైద్యులు అంటున్నారని, ఆయన త్వరగా కోలుకోవాలని ఆకాంక్షించారు. మరోవైపు తారకరత్న ఆరోగ్యం నిలకడగా ఉందని, పూర్తిగా కోలుకోవడానికి మరికొంత సమయం పడుతుందని చంద్రబాబు తెలిపారు.