సరిపడా యూరియా ఏదీ?

దుకాణాల చుట్టూ తిరుగుతున్న రైతులు
ప్రైవేటులో అదనంగా వసూలు

ఈనాడు, అమరావతి: రాష్ట్రంలో రబీ సాగు భారీగా తగ్గినా.. అందుకు సరిపడా ఎరువులు అందుబాటులో లేవు. కొద్ది రోజులుగా యూరియా కొరత వెంటాడుతోంది. ఎప్పటికప్పుడు సర్దుబాటు చేస్తున్నామని చెప్పడం తప్పితే.. అవసరం మేరకు నిల్వలను సిద్ధం చేయడంపై ప్రభుత్వం దృష్టి పెట్టడం లేదు. రైతులు బస్తాకు రూ.60 నుంచి రూ.100 వరకు అదనంగా చెల్లించి కొనుగోలు చేయాల్సి వస్తోంది. రైతు భరోసా కేంద్రాల ద్వారా ఎరువుల్ని అందుబాటులో ఉంచామని చెబుతున్నా.. అక్కడికెళ్లిన అన్నదాతలకు నిల్వలు లేవనే సమాధానం వస్తోంది. పలుకుబడి ఉన్న వారికి, అధికార పార్టీకి చెందిన వారికే ప్రాధాన్యం లభిస్తోందని ఆరోపిస్తున్నారు. నిల్వలు వస్తున్నా తమకు కేటాయింపులు తగ్గిస్తున్నారని సహకార సంఘాలు, ప్రైవేటు డీలర్లు వెల్లడిస్తున్నారు. రామగుండం ఎరువుల కర్మాగారం నుంచి సరఫరా తగ్గడం కూడా కొరతకు కారణంగా చెబుతున్నారు. విజయవాడలో అధికార పార్టీకి చెందిన మాజీ మంత్రుల జోక్యంతో వారి బంధువుల దుకాణాలకు అధిక పరిమాణంలో ఎరువులు ఇస్తున్నారని,  మిగిలిన దుకాణాలకు సరిపడా అందడం లేదనే విమర్శలూ వ్యక్తమవుతున్నాయి. రబీ సాగులో భాగంగా రాష్ట్రంలో జనవరి 25 నాటికి 49.37 లక్షల ఎకరాల్లో పంటలు వేయాలి. వారం కిందటి వరకు 38.62 లక్షల ఎకరాల్లోనే సాగు నమోదైంది. అంటే 10.75 లక్షల ఎకరాలు తగ్గినట్లే. సుమారు 3.5 లక్షల ఎకరాల వరకు వరి, 3 లక్షల ఎకరాల్లో సెనగ తగ్గింది. జొన్న, పెసర సగానికి పడిపోయింది.