శ్రీ అన్న చేయూతనిచ్చేనా?

చిరుధాన్యాల రైతుల ఆశ

ఈనాడు-అమరావతి: చిరుధాన్యాల వాడకం ద్వారా ఆరోగ్యపరంగా ఎన్నో ప్రయోజనాలున్నా.. వాటిని సాగు చేసే రైతులకు మాత్రం కలిసి రావడం లేదు. పెట్టుబడులు పెరుగుతున్నాయి. వాతావరణ మార్పులతో దిగుబడులూ అనుకూలించడం లేదు. ఎకరాకు 3, 4 క్వింటాళ్లు వస్తే ఎక్కువన్నట్లు ఉంది. అధిక దిగుబడినిచ్చే వంగడాలు లేకపోవడమూ దీనికొక కారణం. ‘శ్రీ అన్న’ పథకం ద్వారా చిరుధాన్యాల సాగు ప్రోత్సహించాలని, పరిశోధన మండలి ద్వారా చేయూతనందించాలని కేంద్రం నిర్ణయించింది. ఈ దిశలో రాష్ట్ర ప్రభుత్వం కూడా రెండేళ్ల కిందటే మిల్లెట్‌ మిషన్‌ ఏర్పాటు చేసింది. ఈ దిశగా కేంద్ర, రాష్ట్ర ప్రభుత్వాలనుంచి చేయూత లభిస్తే వెనకబడిన జిల్లాల్లోని వర్షాధార ప్రాంతాల్లో సాగు పెరుగుతుంది. రైతులకు ప్రయోజనం లభిస్తుంది.

6వ స్థానంలో ఆంధ్రప్రదేశ్‌

చిరుధాన్యాల సాగులో మొదటి స్థానం, ఎగుమతుల్లో రెండో స్థానంలో భారత్‌ నిలిచింది. దేశవ్యాప్తంగా పరిశీలిస్తే.. ఉత్పత్తిలో మహారాష్ట్ర, కర్ణాటక, రాజస్థాన్‌, తమిళనాడు, ఉత్తరప్రదేశ్‌ తర్వాత ఏపీ ఉంది. 1990-2000 మధ్య కాలంతో పోలిస్తే అన్ని రకాల చిరుధాన్యాల సాగు 15లక్షల ఎకరాలనుంచి 4లక్షల ఎకరాలకు పడిపోయినట్లు అంచనా. ఈ మేరకు ఉత్పత్తీ తగ్గింది. కొర్ర, వరిగ, సామ తదితర చిరుధాన్యాల ఉత్పత్తి 2016-17లో 24వేల టన్నులు ఉండగా.. 2021-22 సంవత్సరంలో 13 వేల టన్నులకు పడిపోయింది.

రైతులేం కోరుతున్నారంటే..

* అధిక దిగుబడినిచ్చే వంగడాలు

* క్వింటాకు రూ.5వేలకు తగ్గకుండా మద్దతు ధర

* మద్దతు ధరపై ప్రభుత్వమే కొనడం

* ప్రతి మండలంలోనూ చిరుధాన్యాల ప్రాసెసింగ్‌ కేంద్రాలు

* కేంద్రాలను ఏర్పాటుచేసే యువతకు రాయితీ రుణాలు

* ఉపఉత్పత్తుల తయారీపై పొదుపు సంఘాలకు శిక్షణ