వచ్చే నెలలో దేవాలయ పర్యాటకం

నాలుగు సర్క్యూట్లలో బస్సులు నడిపేలా ప్రణాళిక
ఏపీటీడీసీ ఛైర్మన్‌ వరప్రసాద్‌రెడ్డి వెల్లడి

ఈనాడు, అమరావతి: రాష్ట్రంలోని నాలుగు సర్క్యూట్లలో వచ్చే నెలలో దేవాలయ పర్యాటకాన్ని (టెంపుల్‌ టూరిజం) ప్రారంభిస్తామని రాష్ట్ర పర్యాటకాభివృద్ధి సంస్థ (ఏపీటీడీసీ) ఛైర్మన్‌ ఎ.వరప్రసాద్‌రెడ్డి తెలిపారు.  ఏపీటీడీసీ ఎండీ కన్నబాబు, ఎగ్జిక్యూటివ్‌ డైరెక్టర్లు మల్‌రెడ్డి, గోవిందరావుతో కలిసి ఇందుకు సంబంధించిన క్యాలెండర్‌ను ఛైర్మన్‌ గురువారం ఆవిష్కరించారు. అనంతరం విలేకరులతో మాట్లాడారు. ‘విజయవాడ-శ్రీశైలం, విజయవాడ-తిరుమల, విజయవాడ-విశాఖపట్నం, విశాఖపట్నం-అరసవల్లి ప్రాంతాలను సర్క్యూట్లుగా విభజించి వీటి మధ్య బస్సులు నడపాలని నిర్ణయించాం. ఒక్కో సర్క్యూట్‌ పరిధిలో ఆయా ప్రాంతాల్లోని ప్రసిద్ధ 10-12 దేవాలయాలను చేర్చుతున్నాం. వీటిలో భక్తులకు దేవాదాయ ధర్మాదాయశాఖ సహకారంతో ప్రత్యేక దర్శనం ఏర్పాట్లు చేస్తున్నాం. రెండు రోజుల ప్యాకేజీ అందుబాటు ధరల్లో ఉండేలా చర్యలు తీసుకుంటున్నాం. ప్రైవేట్‌ ఆపరేటర్లతో కలిసి కార్యక్రమాన్ని ప్రారంభిస్తున్నాం.  ఆన్‌లైన్‌తోపాటు ప్రైవేట్‌ ఏజెంట్ల దగ్గర టికెట్లు అందుబాటులో ఉండేలా ఏర్పాట్లు చేస్తున్నాం.