మద్యం కొనుగోలుదారుల ఫొటోల సేకరణ

గొలుసు దుకాణాల నియంత్రణకంటున్న సిబ్బంది

ఆత్మకూరు, న్యూస్‌టుడే: శ్రీపొట్టిశ్రీరాములు నెల్లూరు జిల్లా ఆత్మకూరులో మద్యం కొనేవారి ఫొటోలు తీయడంపై వివాదం నెలకొంది. శనివారం చేజర్ల మండలానికి చెందిన ఒక వ్యక్తి వచ్చి మూడు మద్యం సీసాలు అడిగారు. మద్యం ఇచ్చే ముందు సిబ్బంది అతని ఫొటో తీశారు. ఎందుకని ఆ వ్యక్తి ప్రశ్నించడంతో వివాదం ఏర్పడింది. కొద్దిరోజులుగా దుకాణాల్లో మూడు, అంత కన్నా ఎక్కువ బాటిళ్లు తీసుకొనేవారి ఫొటోలు తీస్తున్నారు. దుకాణాల సిబ్బంది నంబర్లతో వాట్సప్‌ గ్రూపు ఏర్పాటుచేసి అందులో ఈ ఫొటోలు పెడుతున్నారు. ఒకచోట కొన్న వ్యక్తి మరో ప్రాంతానికి వస్తే గుర్తించేందుకు చేస్తున్నామని సిబ్బంది చెబుతున్నారు. బస్టాండు కూడలిలో ఉన్న దుకాణం సిబ్బంది బెల్టుషాపుల వారికి విక్రయించడంతో ఇద్దరిని తొలగించామని అంటున్నారు. ఈ విషయమై ఎక్సైజ్‌ సీఐ రామారావును వివరణ కోరగా గొలుసు దుకాణాలను నియంత్రించేందుకే ఇలా మూడు బాటిళ్ల కన్నా ఎక్కువగా తీసుకెళ్లేవారి ఫొటోలు తీసి గ్రూపులో పెడుతున్నట్లు తెలిపారు.