డిమాండుకు తగినట్లు మద్యం సరఫరా అవుతోందా?

ఎన్ని రోజులకోసారి స్టాకు వస్తోంది?
ఏ రకం మద్యం ఎక్కువగా తాగుతున్నారు?
మద్యం అమ్మకాలు పెంచుకోవటమే లక్ష్యంగా ప్రభుత్వం సర్వే

ఈనాడు, అమరావతి: దశలవారీగా మద్యనిషేధం అమలు చేస్తామని, మద్యంపై వచ్చే ఆదాయాన్ని క్రమంగా తగ్గించుకుంటూ వెళ్తామని పలు సందర్భాల్లో చెప్పిన సీఎం జగన్‌ నేతృత్వంలోని ప్రభుత్వం.. ఇప్పుడు మందుబాబులతో మరింత ఎక్కువగా తాగించటమెలా? తద్వారా ఆదాయం ఇంకా పెంచుకోవటమెలా.. అనేదానిపై దృష్టిసారించింది.  అమ్మకాలు ఏ సమయంలో ఎక్కువగా జరుగుతున్నాయి? మందుబాబులు ఎలాంటి మద్యం తాగటానికి ఎక్కువ ఆసక్తి చూపిస్తున్నారు? ఏ వయసువారు ఎక్కువగా కొంటున్నారు? డిమాండుకు తగ్గట్లుగా మద్యం సరఫరా అవుతోందా.. లేదా? వంటి అంశాలపై ఈ సర్వే చేయిస్తోంది. లోటుపాట్లు ఎక్కడున్నాయో చూసుకుని వాటికి అనుగుణంగా మార్కెటింగ్‌ వ్యూహాలు రూపొందించుకోవటం, అమ్మకాలు పెంచుకోవటమే ఈ   సర్వే లక్ష్యంగా కనిపిస్తోందన్న విమర్శలు వ్యక్తమవుతున్నాయి. మద్యం దుకాణాల సూపర్‌వైజర్లకు ఓ  ప్రశ్నావళిని పంపించింది. ఆన్‌లైన్‌లో సమాధానాలివ్వాలని ఆదేశించింది. ఇటీవల బ్రూవరీస్‌ కార్పొరేషన్‌ ఎండీ వాసుదేవరెడ్డి టెలీకాన్ఫరెన్స్‌ నిర్వహించి ఈ ప్రశ్నావళికి సమాధానాలు పంపించాలని సూపర్‌వైజర్లను ఆదేశించారు. జిల్లా పేరు, మద్యం డిపో, నియోజకవర్గం, మద్యం దుకాణం లైసెన్సు సంఖ్య తదితర వివరాలను పొందుపరిచి.. ఈ సర్వేకు సూపర్‌వైజర్లు సమాధానాలు ఇస్తున్నారు.