Andhra News: వలస కూలీగా సర్పంచి

బొల్లాపల్లి, న్యూస్‌టుడే: కర్నూలు జిల్లా మంత్రాలయం మండలం బూదూరు సర్పంచి రామతీర్థం నాగరాజు వలస కూలీగా మారారు. ప్రస్తుతం ఆయన పల్నాడు జిల్లా బొల్లాపల్లి మండలం గంగులపాలెంలో కుటుంబంతోపాటు వలస వచ్చి మిరప కోతల కూలీకి వెళ్తున్నారు. నాగరాజు గత పంచాయతీ ఎన్నికల్లో తెదేపా మద్దతుతో సర్పంచిగా గెలుపొందారు. కుటుంబ ఆర్థిక పరిస్థితులు సహకరించక పిల్లలిద్దర్నీ చదువు మాన్పించి పనులకు తీసుకొచ్చినట్లు తెలిపారు. ‘ఎలాగూ అభివృద్ధి పనులకు నిధులు రావడం లేదు. మండల సమావేశాలకూ అధికారులు నన్ను పిలవడం లేదు. మా ప్రాంతంలో పనులూ లేవు. అందుకే కుటుంబంతో కలిసి పనులకు వచ్చా’ అని నాగరాజు వెల్లడించారు.