కాపులకు 5% రిజర్వేషన్‌ అమలు చేసేలా ఆదేశించండి

హైకోర్టులో హరిరామజోగయ్య వ్యాజ్యం
సీఎంని ప్రతివాదిగా చేర్చడంపై రిజిస్ట్రీ అభ్యంతరం
పేరు తొలగిస్తానన్న పిటిషనర్‌ తరఫు న్యాయవాది

ఈనాడు, అమరావతి: కాపులకు 5% రిజర్వేషన్‌ కల్పించేలా ఆదేశాలు జారీ చేయాలని కోరుతూ కాపు సంక్షేమ సేన వ్యవస్థాపక అధ్యక్షుడు, మాజీ మంత్రి హరిరామజోగయ్య హైకోర్టులో వ్యాజ్యం వేశారు. ఆర్థికంగా వెనుకబడిన వర్గాలకు (ఈడబ్ల్యూఎస్‌) కేంద్రం కేటాయించిన 10% రిజర్వేషన్లలో... కాపులకు 5% కేటాయిస్తూ మాజీ సీఎం చంద్రబాబు హయాంలో తీసుకొచ్చిన చట్టాన్ని అమలు చేయాలని కోరారు. ఈ వ్యాజ్యంలో ప్రస్తుత ముఖ్యమంత్రి పేరును ప్రతివాదుల జాబితాలో చేర్చడంపై హైకోర్టు రిజిస్ట్రీ అభ్యంతరం తెలుపుతూ నంబరు కేటాయించేందుకు నిరాకరించింది. ఈ నేపథ్యంలో సోమవారం ఈ వ్యవహారంపై హైకోర్టు న్యాయమూర్తి జస్టిస్‌ ఆర్‌.రఘునందన్‌రావు విచారణ జరిపారు. పిటిషనర్‌ తరఫున న్యాయవాది పోలిశెట్టి రాధాకృష్ణ వాదనలు వినిపిస్తూ... ‘కాపులకు రిజర్వేషన్‌ కల్పించే వ్యవహారాన్ని వైకాపా మ్యానిఫెస్టోలో పెట్టింది. అధికారంలోకి వచ్చాక అందుకు భిన్నంగా వ్యవహరిస్తోంది. జీవోను తీసుకొచ్చింది. ఈ నేపథ్యంలో ముఖ్యమంత్రిని ప్రతివాదిగా పేర్కొన్నాం’ అని వివరించారు. న్యాయమూర్తి స్పందిస్తూ... మ్యానిఫెస్టో అంశాల అమలుకు న్యాయస్థానాలు ఆదేశించలేవన్నారు. దీంతో న్యాయవాది స్పందిస్తూ.. ముఖ్యమంత్రి పేరును ప్రతివాదుల జాబితా నుంచి తొలగిస్తామన్నారు. ఆ వివరాలను పరిగణనలోకి తీసుకున్న న్యాయమూర్తి... వ్యాజ్యానికి నంబరు కేటాయించాలని హైకోర్టు రిజిస్ట్రీని ఆదేశించారు. ఈ పిటిషన్‌పై హైకోర్టులో మంగళవారం విచారణ జరగనుంది.