ఏపీకి చేసిన సాయం ఏమిటి?

తిరుపతి, న్యూస్‌టుడే: ‘తుపాన్లు, వర్షాలు, వరదల కారణంగా ఆంధ్రప్రదేశ్‌కు కలిగిన నష్టం గురించి మీకు తెలుసా... తెలిస్తే చేసిన సాయం ఏమిటో తెలపాలి’ అని తిరుపతి ఎంపీ గురుమూర్తి మంగళవారం పార్లమెంటు సమావేశాల్లో కేంద్రాన్ని ప్రశ్నించారు. 2021లో రాష్ట్రంలో భారీ వర్షాల కారణంగా రైతులు భారీగా పంటలు నష్టపోయారని, రోడ్లు దెబ్బతిన్నాయంటూ కేంద్రానికి రాష్ట్రం లేఖ రాసిందన్నారు. తమకు కలిగిన నష్టం రూ.6054.29 కోట్లుగా ఉందని, తక్షణ సాయంగా రూ.1000 కోట్లు విడుదల చేయాలని అభ్యర్థించిందన్నారు. స్పందించిన కేంద్ర గృహ వ్యవహారాల శాఖ సహాయ మంత్రి నిత్యానందరాయ్‌ మాట్లాడుతూ... ‘రాష్ట్రం నుంచి ఎలాంటి నివేదిక కోసం ఎదురు చూడకుండానే నష్టాన్ని అంచనా వేసేందుకు మేం కమిటీని ఏర్పాటు చేశాô. ఈ కమిటీతోపాటు మరో రెండు కమిటీల సూచనలకు అనుగుణంగా రూ.351.43 కోట్లు సాయం చేశాం. ఎన్డీఆర్‌ఎఫ్‌ కింద కేంద్ర వాటాగా ఇవ్వాల్సిన రూ.895.20 కోట్లు రెండు దఫాలుగా విడుదల చేశాం’ అని వివరించారు.