Andhra News: మళ్లీ అప్పునకు అనుమతి

ఈనాడు, అమరావతి: కేంద్ర ప్రభుత్వం నుంచి కొత్త రుణాలకు రాష్ట్రానికి అనుమతులు వచ్చాయి. ఈ ఆర్థిక సంవత్సరంలో మరో రూ.2,929 కోట్ల బహిరంగ మార్కెట్‌ రుణాలకు కేంద్ర ఆర్థికశాఖ అనుమతులు ఇచ్చింది. విద్యుత్తు రంగంలో సంస్కరణలు అమలు చేసినందుకు ఈ వెసులుబాటు ఇస్తున్నట్లు కేంద్రం పేర్కొంది. కేంద్ర ఇంధనశాఖ సిఫార్సుతో కొత్త రుణాలకు ఆస్కారం ఏర్పడింది. రాష్ట్రంలో విద్యుత్తు సంస్కరణలు అమలుచేస్తే జీఎస్‌డీపీలో 0.5% అదనపు రుణాలు పొందేందుకు కేంద్రం వెసులుబాటు ఇచ్చింది. ఈ కోటాలోనే అదనపు రుణం మంజూరు చేస్తున్నట్లు కేంద్ర ఆర్థికశాఖ వెల్లడించింది. ఈ కొత్త రుణంతో కలిపి ప్రస్తుత ఆర్థిక సంవత్సరంలో రాష్ట్రానికి రూ.52,789 కోట్ల బహిరంగ మార్కెట్‌ రుణాలకు అవకాశం లభించినట్లయింది. మార్చి నెలాఖరు వరకు ఈ రుణం పొందే వీలుంటుంది.