AP Budget: ఫ్యాన్సీ నంబర్లా! బడ్జెట్‌ అంచనాలా!!

రూ. 2,79,279.27 కోట్లు

ఈ అంకె చూస్తుంటే మంచి ఫ్యాన్సీ నంబరు గుర్తొస్తోంది కదూ.! దీనికి చాలా ప్రాధాన్యం ఉంది. ఇది ఆంధ్రప్రదేశ్‌ రాష్ట్రం 2023-24 బడ్జెట్‌ అంచనాల మొత్తం. ఈ అన్ని అంకెలు కలిపితే మొత్తం సంఖ్య 9.

రూ. 2,56,256.56 కోట్లు

ఇదీ మరో ఫ్యాన్సీ నంబరులా ఉంది కదా!  2022-23 ఆర్థిక సంవత్సరంలో ఆర్థిక మంత్రి బుగ్గన సమర్పించిన నాటి బడ్జెట్‌ అంచనాల మొత్తం ఇది.

రూ. 2,29,779.27 కోట్లు

ఇందులో కూడా... కేవలం 3 అంకెలు మాత్రమే మళ్లీ మళ్లీ వచ్చేలా కూర్చారు. ఇది 2021-22 ఆర్థిక సంవత్సరం బడ్జెట్‌ అంచనాలు. ఈ అంకెలు కలిపితే వచ్చేది తొమ్మిదే.

ప్రతి ఆర్థిక సంవత్సరంలో దాదాపు డిసెంబరు నెల నుంచే ప్రభుత్వశాఖల నుంచి అంచనాలు తీసుకుంటూ ఉంటారు. చర్చలు జరుపుతారు. ఆయా శాఖలు అంతకు ముందు ఏడాది ఏ మేరకు ఖర్చు చేశాయో పరిశీలిస్తారు. ఆ ప్రకారం కొత్త ఆర్థిక సంవత్సరంలో ఎంత మొత్తం ఇవ్వాలో, రాబడి అంచనాలు, అవసరాలు, ప్రాధాన్యాల ఆధారంగా తేలుస్తారు. ఇన్ని కోణాల్లో ఆలోచించి లెక్కలు తేల్చే క్రమంలో కూడా ఇలా...  ఫ్యాన్సీ నంబర్లు సాధించ గలుగుతున్నారంటే బడ్జెట్‌ కసరత్తు ఏ స్థాయిలో జరుగుతోందన్నది చర్చనీయాంశమైంది.