భూ సమస్య పరిష్కరించలేదని సెల్‌టవర్‌ ఎక్కి రైతు నిరసన

వీరపునాయునిపల్లె, న్యూస్‌టుడే: భూ సమస్యను పరిష్కరించడంలో అధికారులు నిర్లక్ష్యం చేస్తున్నారని వైయస్‌ఆర్‌ జిల్లా వీరపునాయునిపల్లెకు చెందిన రైతు సోమా మనోహరరెడ్డి శనివారం తన పొలంలోని సెల్‌టవర్‌ ఎక్కి నిరసన తెలిపారు. సమస్య పరిష్కరించకపోతే ప్రాణ త్యాగానికైనా సిద్ధమని హెచ్చరించారు. విషయం తెలిసి తహసీల్దారు ఉదయభారతి, సిబ్బంది, పోలీసులతో కలిసి అక్కడికి చేరుకున్నారు. సమస్య పరిష్కరిస్తామని హామీ ఇవ్వడంతో రైతు టవర్‌ పైనుంచి కిందికి దిగారు. రైతు మాట్లాడుతూ దాయాదుల మధ్య భూ సమస్య ఉందని, కొలతలు వేసి పరిష్కరించాలని రెవెన్యూ అధికారులకు వినతులు ఇచ్చి నాలుగైదేళ్లు అవుతున్నా పరిష్కరించలేదని ఆరోపించారు. విధిలేక నిరసన తెలపాల్సి వచ్చిందన్నారు.