పంట రుణ పరిమితి పెంపు

ఎకరా వరికి ఖరీఫ్‌లో గరిష్ఠంగా రూ.42 వేలు.. రబీలో రూ.45వేలు

ఈనాడు-అమరావతి: వచ్చే ఖరీఫ్‌లో వరి సాగుకు పంట రుణ పరిమితిగా రూ.42వేలు, రబీలో రూ.45వేలు చొప్పున గరిష్ఠంగా ఇవ్వాలని రాష్ట్ర స్థాయి సాంకేతిక కమిటీ సమావేశం తీర్మానించింది. వ్యవసాయశాఖ ప్రత్యేక ప్రధాన కార్యదర్శి గోపాలకృష్ణ ద్వివేది అధ్యక్షతన సోమవారం మంగళగిరిలో నిర్వహించిన ఈ సమావేశానికి వ్యవసాయశాఖ ప్రత్యేక కమిషనర్‌ చేవూరు హరికిరణ్‌, సహకారశాఖ కమిషనర్‌ బాబు, ఆప్కాబ్‌ ఎండీ శ్రీనాథ్‌రెడ్డి, ఉద్యానశాఖ కమిషనర్‌ శ్రీధర్‌, బ్యాంకర్ల కమిటీ ప్రతినిధులు హాజరయ్యారు. ఈ సందర్భంగా జిల్లాల వాతావరణ పరిస్థితులు, జిల్లా స్థాయి సాంకేతిక కమిటీలు తయారు చేసిన పంట రుణ పరిమితులను పరిగణనలోకి తీసుకుని 2023-24 సంవత్సరానికి సగటున 15% నుంచి 20% మేర పెంచాలని నిర్ణయించింది. ఏప్రిల్‌ నుంచి వీటిని అమల్లోకి తీసుకురావాలని ద్వివేది ఆదేశించారు.