డీలర్లకు గౌరవ వేతనం ఇవ్వాలి

అఖిల భారత రేషన్‌ డీలర్ల సమాఖ్య డిమాండు

ఈనాడు, దిల్లీ: దేశవ్యాప్తంగా చౌక ధరల దుకాణాల డీలర్లకు ఒకే రకమైన కమీషన్‌ లేదా గౌరవ వేతనం ఇవ్వాలని అఖిల భారత రేషన్‌ డీలర్ల సమాఖ్య నాయకులు డిమాండు చేశారు. సమస్యల పరిష్కారం కోరుతూ దిల్లీ జంతర్‌మంతర్‌ రోడ్డులో సమాఖ్య ఆధ్వర్యంలో డీలర్లు బుధవారం ధర్నా చేశారు. ఈ సందర్భంగా రేషన్‌ డీలర్ల సమాఖ్య ఆర్గనైజింగ్‌ కార్యదర్శి మునగా గిరిజారావు మాట్లాడుతూ.. డీలర్లకు గౌరవ వేతనంగా నెలకు రూ. 50 వేలు ఇవ్వాలని కోరారు. అధికారులు వేధింపులను అరికట్టాలని, బియ్యం, గోధుమలు, పంచదార వంటి సరకుల్లో క్వింటాకు ఒక కిలో తరుగుకు అంగీకరించాలని కోరారు. కరోనాతో చనిపోయిన డీలర్లకు రాజస్థాన్‌ ప్రభుత్వం చెల్లించినట్లే రూ. 50 లక్షల పరిహారం ఇవ్వాలని డిమాండు చేశారు. ధర్నాలో సమాఖ్య రాష్ట్ర నాయకులు కూరపాటి సుబ్బారావు, కేఎస్‌వీ రామారావు, ఖాజా మొహియుద్దీన్‌ తదితరులు పాల్గొన్నారు.