బకాయిలు చెల్లిస్తేనే డయాలసిస్‌ సేవలు

లేకుంటే 28 నుంచి నిలిపివేత
టెక్కలి ఆసుపత్రిలో ఏజెన్సీ పబ్లిక్‌ నోటీసు

టెక్కలి పట్టణం, న్యూస్‌టుడే: ప్రభుత్వం బిల్లుల బకాయిలను చెల్లించకపోవడంతో ప్రభుత్వాసుపత్రుల్లో అందించే రకరకాల సేవలను కొనసాగించేందుకు ఏజెన్సీలు వెనకడుగేసే దుస్థితి నెలకొంది. నెఫ్రోప్లస్‌తోపాటు మరో యాజమాన్యం ద్వారా రాష్ట్రవ్యాప్తంగా ఎంపికచేసిన కేంద్రాల్లో రోగులకు డయాలసిస్‌ సేవలు అందుతున్న విషయం తెలిసిందే. ఈ రెండు సంస్థలకు గత కొద్ది నెలలుగా ప్రభుత్వం నుంచి చెల్లింపులు మందకొడిగా సాగుతున్నాయి. ఈ నేపథ్యంలో శ్రీకాకుళం జిల్లాలోని టెక్కలి ఆసుపత్రిలో బిల్ల్లుల చెల్లింపు జరగనందున ఈ నెల 28 నుంచి డయాలసిస్‌ సేవలను నిలిపివేస్తున్నామని ఆసుపత్రి ప్రాంగణంలోని నోటీసు బోర్డులో నెఫ్రోప్లస్‌ యాజమాన్యం గురువారం పబ్లిక్‌ నోటీసును ఏర్పాటుచేసింది. ‘‘టెక్కలి ఆసుపత్రిలో మే, 2022 నుంచి మాకు నెల వారీగా చెల్లింపులు జరగడంలేదు. ఈ నెల 27వ తేదీలోగా బకాయిపడ్డ బిల్లులను చెల్లించకుంటే మరసటిరోజు నుంచి డయాలసిస్‌ సేవలు నిలిపివేయడం మినహా మాకు వేరే మార్గంలేదు’ అని ఆ నోటీసులో పేర్కొంది. ఈ ఆసుపత్రి వరకు మాత్రమే సుమారు కోటిన్నర రూపాయలకు ప్రభుత్వం బకాయి పడింది. జిల్లా అధికారుల ద్వారా  పదేపదే విజ్ఞప్తిచేసినా ఫలితం కనిపించనందువల్లే పరిస్థితి ఇంత వరకు వచ్చిందని     చెబుతున్నారు. ఈ పరిణామంతో రోగులు ఆందోళన వ్యక్తం చేస్తున్నారు. దీనిపై టెక్కలి జిల్లా ఆసుపత్రి సూపరింటెండెంట్‌ సూర్యారావును వివరణ కోరగా, ఈ సమస్యను ఆరోగ్యశాఖ కమిషనర్‌, కలెక్టరు దృష్టికి తీసుకువెళ్లి పరిష్కరిస్తామని చెప్పారు.