బోయ, వాల్మీకులను ఎస్టీల్లో చేర్చాలన్న తీర్మానంపై నిరసన

పాడేరు పట్టణం, న్యూస్‌టుడే: బోయ, వాల్మీకి సామాజికవర్గాలను ఎస్టీ జాబితాలో చేర్చాలంటూ అసెంబ్లీలో చేసిన తీర్మానంపై అల్లూరి సీతారామరాజు జిల్లాలోని గిరిజనులు తీవ్ర అభ్యంతరం వ్యక్తం చేశారు. శుక్రవారం రాత్రి జిల్లా కేంద్రం పాడేరులో ఆదివాసీ జేఏసీ, గిరిజన సంఘం, ప్రజా సంఘాలు, అఖిలపక్షం నేతలు కొవ్వొత్తులతో నిరసన చేపట్టారు. పాడేరు, అరకులోయ ఎమ్మెల్యేల చిత్రపటాలు పట్టుకొని శ్రద్ధాంజలి ఘటించారు. సీఎం జగన్‌.. గిరిజనుల ద్రోహి అని ఆరోపించారు. ఆదివాసీ జేఏసీ జిల్లా కన్వీనర్‌ రామారావు దొర మాట్లాడుతూ గిరిజన హక్కులు కాలరాసే తీర్మానాన్ని తక్షణమే వెనక్కి తీసుకోవాలని డిమాండు చేశారు.