విద్యుత్తు రాయితీ భారాన్ని ప్రభుత్వమే భరిస్తుంది

మంత్రి పెద్దిరెడ్డి రామచంద్రారెడ్డి

ఈనాడు, అమరావతి: వివిధ సంక్షేమ పథకాల కింద అందించే విద్యుత్తుకు సంబంధించి రూ.10,135 కోట్ల రాయితీ భారాన్ని ప్రభుత్వమే భరిస్తుందని మంత్రి పెద్దిరెడ్డి రామచంద్రారెడ్డి పేర్కొన్నారు. అధిక విద్యుత్తును వినియోగించే ఫెర్రో అల్లాయిస్‌ పరిశ్రమలు మినహా..మిగిలిన వినియోగదారులపై ఛార్జీల భారం పడకుండా నిర్ణయం తీసుకున్నట్లు తెలిపారు. ఆదివారం విద్యుత్తు వినియోగదారులతో వర్చువల్‌ సమావేశంలో ఆయన మాట్లాడుతూ.. ‘‘వ్యవసాయానికి ఉచిత విద్యుత్తుకు రూ.7,641.85 కోట్లు, ఆక్వాకల్చర్‌ రంగానికి రూ.1,206.20 కోట్లు, ఎస్సీ. ఎస్టీ, ఎంబీసీ, దోబీఘాట్‌లు, ఇతర వర్గాల వినియోగదారులకు ఇచ్చే ఉచిత విద్యుత్తుకు రాయితీ కింద రూ.1,238.30 కోట్లను ప్రభుత్వం భరించనుంది. 200 యూనిట్ల లోపు విద్యుత్తు వినియోగించే ఎస్సీ, ఎస్టీ వినియోగదారులకు ప్రభుత్వం ఉచితంగా అందిస్తుంది’’ అని వివరించారు.