భద్రాద్రి రామయ్యకు నూతన ముత్తంగి అలంకారం

భద్రాచలం, న్యూస్‌టుడే: భద్రాచలం శ్రీసీతారామచంద్రస్వామి వారికి ప్రతి సోమవారం ముత్తంగి(ముత్యాలు పొదిగిన వస్త్రం) రూపంలో అలంకరణ చేస్తుంటారు. గతంలో ఓ దాత ఇచ్చిన ఈ అలంకారం పాతబడింది. ఆలయ అర్చకుల చొరవతో హైదరాబాద్‌కు చెందిన సంతోష్‌రెడ్డి రూ.30 లక్షలు వెచ్చించి నూతన అలంకారాన్ని తయారు చేయించారు. ఈ అలంకార వస్త్రాలకు ఆదివారం సంప్రోక్షణ పూజలు చేసిన అనంతరం ఈవో రమాదేవి, ఏఈవో శ్రావణ్‌కుమార్‌, ప్రధానార్చకులు సీతారామానుజాచార్యులుకు అందించారు.

నిత్య హోమాలు.. చతుర్వేదాల పఠనం

శ్రీరామనవమి, పుష్కర సామ్రాజ్య పట్టాభిషేక మహోత్సవాల్లో భాగంగా శ్రీసీతారామచంద్రస్వామివారి ఆలయంలో ఆదివారం నిత్య హోమాలు నిర్వహించారు. రుత్విక్కులు చతుర్వేదాలను పఠించారు. శ్రీవిష్ణు సహస్రనామ స్తోత్రంతో పాటు సంక్షేప రామాయణాన్ని సామూహికంగా పారాయణం చేశారు. శ్రీసుదర్శనేష్టి హోమం నిర్వహించారు. సోమవారం ధ్వజపట భద్రక మండల లేఖన పూజలు ఉంటాయని స్థానాచార్యులు స్థలసాయి తెలిపారు. ఈ పటాన్ని స్థానిక జీయర్‌ మఠం నుంచి తీసుకువచ్చి రామాలయంలో గరుడాధివాసం చేస్తారు.