వాహనాల ఫిట్‌నెస్‌ పరీక్షలేవీ?.. కాగ్‌ ఆక్షేపణ

ఈనాడు, అమరావతి: త్రైమాసిక పన్నులు, ఇతర ఫీజులు, జరిమానాల పూర్తి స్థాయి వసూళ్లలో రాష్ట్రంలో రవాణాశాఖ విఫలమైందని కాగ్‌ ఆక్షేపించింది. 2020-21 ఆర్థిక సంవత్సరానికి సంబంధించిన వివిధ పన్నుల వసూళ్లలో వెనకబాటుతనాన్ని ప్రస్తావించింది.

* 1.18 లక్షల వాహనాలకు వార్షిక సామర్థ్య పరీక్షలు చేయకపోవడంతో రూ.5.99 కోట్ల మేర ఫీజు వసూలు కాలేదని, ఇది రహదారి భద్రత విషయంలో రాజీ పడటమేనని పేర్కొంది.

* 75,621 రవాణా వాహనాలు, 406 రవాణాయేతర వాహనాలపై రూ.1.53 కోట్ల హరితపన్ను వసూలు చేయలేకపోయారని ప్రస్తావించింది.

* 5,151 రవాణా వాహనాల యజమానులనుంచి రూ.7.62 కోట్ల మేర త్రైమాసిక పన్ను జరిమానా వసూలు కాలేదని తెలిపింది.

* అపరాధ రుసుముల కాంపౌండింగ్‌ ఫీజు సవరించినాసరే.. పాత రేటుతో 3,176 వాహనాలకు ఫీజులు విధించడం వల్ల రూ.6.03 కోట్లు తక్కువగా వసూలైందని పేర్కొంది.

* 1,179 సెకండ్‌ హ్యాండ్‌ వ్యక్తిగత వాహనాల రిజిస్ట్రేషన్‌లో జీవితపన్ను 14 శాతానికి బదులు 12 శాతమే విధించడం వల్ల రూ.1.25 కోట్లు కోల్పోయినట్లు తెలిపింది.

* ఏసీ బస్సుల ప్రయాణికులనుంచి జీఎస్టీ సకాలంలో వసూలు చేయడంలో ఏపీఎస్‌ఆర్టీసీ విఫలమైందని ప్రస్తావించింది. ఆన్‌లైన్‌ టికెటింగ్‌ వ్యవస్థ మార్పులో జాప్యంతో జీఎస్టీ తిరిగి చెల్లించేందుకు వడ్డీ, జరిమానా రూపంలో రూ.3.25 కోట్లు కోల్పోయినట్లు పేర్కొంది.

రిజిస్ట్రేషన్‌, స్టాంపుల శాఖలో..

* 57 దస్తావేజుల్లో లావాదేవీలు తప్పుగా వర్గీకరించడంతో రూ.2.10 కోట్ల మేర స్టాంపు డ్యూటీ, రిజిస్ట్రేషన్‌ ఫీజు తక్కువగా వసూలైంది.

* మార్కెట్‌ధర కంటే తక్కువ రేటుతో ఆస్తుల విలువ కట్టడం, నిర్మాణ ధరలను తప్పుగా తీసుకోవడం, చదరపు గజాలకు బదులు ఎకరం ధరను పరిగణనలోకి తీసుకోవడంవంటి 27 కేసుల్లో రూ.1.10 కోట్ల పన్నులు తక్కువగా వసూలైనట్లు పేర్కొంది.