నేడు దిల్లీకి ముఖ్యమంత్రి జగన్‌

కేంద్ర హోంమంత్రి అమిత్‌ షాతో భేటీ

ఈనాడు, అమరావతి: ముఖ్యమంత్రి వైఎస్‌ జగన్‌ బుధవారం దిల్లీకి వెళ్లనున్నారు. కేంద్ర హోంమంత్రి అమిత్‌ షాతో ఆయన భేటీ కానున్నారు. మధ్యాహ్నం 2గంటల సమయంలో సీఎం దిల్లీకి బయల్దేరి వెళ్లనున్నారు. అమిత్‌ షా అపాయింట్‌మెంట్‌ సాయంత్రమే ఉంటే రాత్రికి తిరిగి రానున్నారు. భేటీ ఆలస్యమైతే బుధవారం రాత్రి దిల్లీలోనే బస చేసి గురువారం తిరిగి వస్తారు.

వరుస పర్యటనలపై చర్చలు: సీఎం జగన్‌ వరుస దిల్లీ పర్యటనలపై రాజకీయవర్గాల్లో పలు రకాల చర్చలు జరుగుతున్నాయి. ఈ నెల 17నే దిల్లీకి వెళ్లి ప్రధాని, కేంద్ర హోంమంత్రిని కలిసి వచ్చిన ముఖ్యమంత్రి, ఇప్పుడు రెండు వారాలు కూడా పూర్తికాకుండానే మళ్లీ కేంద్ర హోంమంత్రిని కలిసేందుకు వెళ్లనుండడం చర్చనీయాంశంగా మారింది. ఈ నెల 17న దిల్లీకి వెళ్లినప్పుడు ప్రధాని, కేంద్ర హోంమంత్రికి ముఖ్యమంత్రి జగన్‌ ఇచ్చిన వినతిపత్రాల వివరాలు వెల్లడికాలేదు. ప్రధానితో సీఎం ప్రస్తావించిన అంశాలు అంటూ ముఖ్యమంత్రి కార్యాలయం ఆ రోజున జారీ చేసిన ప్రకటనలోనూ పోలవరానికి నిధులను అడిగారు, ప్రత్యేకహోదా ప్రస్తావించారు అంటూ పాత విషయాలనే పేర్కొంది. ఈ నేపథ్యంలో మరోసారి సీఎం దిల్లీకి ఎందుకు వెళుతున్నారనేదీ చర్చనీయాంశమైంది.