కదలిరండి.. కదలిరండి రైతన్నలారా!

ఆర్‌-5 జోన్‌కు వ్యతిరేకంగా ఉద్యమ గీతం ఆవిష్కరణ

తుళ్లూరు, న్యూస్‌టుడే: అమరావతి ఉద్యమం 1,250వ రోజుకు చేరిన సందర్భంగా తుళ్లూరు శిబిరంలో శనివారం ఆర్‌-5 జోన్‌కు వ్యతిరేకంగా ప్రత్యేక ఉద్యమ గీతాన్ని ఆవిష్కరించారు. అమరావతి సాంస్కృతిక చైతన్య వేదిక ఆధ్వర్యంలో విశ్రాంత డీఎస్పీ బొప్పన విజయ్‌కుమార్‌ తన సతీమణి విజయకుమారి జ్ఞాపకార్థం ఈ గీతాన్ని సమర్పించారు. గాయకుడు రమణ బృందం ఆలపించింది. భారతీయత స్వచ్ఛంద సంస్థ అధ్యక్షుడు, హైకోర్టు న్యాయవాది చిగురుపాటి రవీంద్రబాబు, అమరావతి సమన్వయ కమిటీ సభ్యుడు పువ్వాడ సుధాకర్‌ ముఖ్య అతిథులుగా పాల్గొని రైతులు, మహిళలతో కలసి గీతాన్ని ఆవిష్కరించారు. ఈ సందర్భంగా సుధాకర్‌ మాట్లాడుతూ అమరావతిపై ప్రభుత్వం కక్షకట్టి ఆర్‌-5 జోన్‌ పేరుతో విధ్వంసం చేస్తోందని ఆగ్రహం వ్యక్తం చేశారు. పేదలకు, రైతులకు మధ్య చిచ్చు పెట్టాలనే రాజధానిలో సెంటు భూమి పంపిణీకి శ్రీకారం చుట్టిందని పేర్కొన్నారు. అమరావతి బృహత్‌ ప్రణాళిక ప్రకారం ఆర్‌-3 జోన్‌లో రైతులతో పాటు, పేదల కోసం 5 శాతం నివాస భూములున్నప్పటికీ ప్రభుత్వం కావాలనే పారిశ్రామిక, వాణిజ్య అవసరాల కోసం కేటాయించిన భూముల్లో ఆర్‌-5 జోన్‌ ఏర్పాటు చేసి పట్టాల పంపిణీకి సిద్ధమైందని మండిపడ్డారు. రాజధాని విధ్వంసం వల్ల రాష్ట్ర ప్రజలకు తీవ్ర నష్టం జరుగుతుంది.. రైతులు ఈ విషయాన్ని గ్రహించి వేలాదిగా తరలివచ్చి శాంతియుత నిరసనల్లో పాల్గొనాలని విజ్ఞప్తి చేశారు. హైకోర్టు న్యాయవాది రవీంద్రబాబు మాట్లాడుతూ రైతులందరూ కలసికట్టుగా ఆర్‌-5 జోన్‌కు వ్యతిరేకంగా ఉద్యమించాలని పిలుపునిచ్చారు. రానున్న ఎన్నికల్లో ఓటు అనే ఆయుధంతో అమరావతి వ్యతిరేక శక్తులను తుదముట్టించాలని ఆయన పిలుపునిచ్చారు. ఈ సందర్భంగా ఏపీ సీఆర్డీఏ చట్టం, ప్రభుత్వం వ్యవహరిస్తున్న తీరుకు సంబంధించిన విషయాలతో కూడిన కరపత్రాలను శిబిరంలో అన్నదాతలకు పంచారు. ఈ కార్యక్రమంలో రైతులు, రైతు కూలీలు మహిళలు పాల్గొన్నారు.