నిధుల వ్యయంపై.. ఆన్‌లైన్‌లో ముందస్తు ఆడిట్‌

పట్టణ స్థానిక సంస్థల్లో.. ఆడిట్‌ శాఖ కొత్త విధానం

ఈనాడు, అమరావతి: రాష్ట్రంలోని పుర, నగరపాలక సంస్థల్లో, నగర పంచాయతీల్లో నిధుల వ్యయానికి సంబంధించి ఆడిట్‌శాఖ ఇక నుంచి ఆన్‌లైన్‌లో ముందస్తు ఆడిట్‌ చేయనుంది. పట్టణ స్థానిక సంస్థల సాధారణ నిధుల్లో నుంచి సమగ్ర ఆర్థిక నిర్వహణ వ్యవస్థ (సీఎఫ్‌ఎంఎస్‌) ద్వారా చేస్తున్న చెల్లింపులపై ముందస్తు ఆడిట్‌ను తప్పనిసరి చేస్తున్నారు. సీఎఫ్‌ఎంఎస్‌లో బిల్లులు ఆమోదించాక ఇప్పటివరకు ఖజానా శాఖకు వెళ్లాక చెల్లింపులు జరుగుతున్నాయి. ఇక నుంచి ఖజానా శాఖకు బదులుగా ఆడిట్‌ శాఖకు ఆన్‌లైన్‌లో పంపే బిల్లులను సంబంధిత అధికారులు పరిశీలిస్తారు. లోపాలుంటే అభ్యంతరాలు వ్యక్తంచేస్తూ వెనక్కి పంపి, సరిచేసి మళ్లీ పంపాలని సూచిస్తారు. అన్నీ సవ్యంగా ఉన్నట్లైతే ఆమోదించి, బిల్లుల చెల్లింపులకు అనుమతిస్తారు. పుర, నగరపాలక సంస్థలు, నగర పంచాయతీల్లో ఒక ఆర్థిక సంవత్సరంలో ఆదాయ, వ్యయాలకు సంబంధించి మరుసటి ఏడాదిలో మే నెల తర్వాత ఆడిట్‌ నిర్వహిస్తున్నారు. ఈ సందర్భంగా లేవనెత్తే అభ్యంతరాలను పట్టణ స్థానిక సంస్థల అధికారులు సకాలంలో పరిష్కరించడం లేదు. అవి ఏళ్ల తరబడి అపరిష్కృతంగా ఉంటున్నాయి. ఇలాంటి వాటిని దృష్టిలో పెట్టుకొని ‘ప్రీ ఆడిట్‌ ప్రొటోకాల్‌’ పేరుతో కొత్త విధానాన్ని తీసుకొస్తున్నారు. దీనికి సంబంధించి ఇప్పటికే ఆర్థిక, ఆడిట్‌, పురపాలక శాఖల ఉన్నతాధికారులు సమావేశమయ్యాయి. సీఎఫ్‌ఎంఎస్‌ నుంచి ఒక లూప్‌ (లింక్‌)ని ఆడిట్‌ శాఖకు అనుసంధానించనున్నారు. ఆడిట్‌ శాఖ అధికారులు తమ కార్యాలయాల్లో నుంచే సీఎఫ్‌ఎంఎస్‌ ద్వారా చెల్లించే బిల్లులను ఆన్‌లైన్‌లో ఆడిట్‌ చేస్తారు. రాబోయే రోజుల్లో ఆర్థిక సంఘం నిధుల వ్యయానికి సంబంధించి కూడా ముందస్తు ఆడిట్‌ చేయాలని భావిస్తున్నారు.